Konni kynlegi

Snjöll aðferð til að klekkja á einhverjum

2007-05-13T09:12:00.000Z

Jæja, þá er búið að kjósa á báðum vígstöðvum þ.e.a.s. til Alþingis og líka í Júróvisjón. Auðvitað kusum við eins og og fyrir okkur var lagt. Við kusum Finnland og Svíþjóð í söngvakeppninni eins og Eiríkur Hauksson lagði svekktur til. Með því klekktum við illilega á Austur-Evrópu. Við kusum líka Sjálfstæðisflokkinn eins og Jóhannes í Bónus stakk svekktur upp á til að klekkja á Birni Bjarnasyni.
Eru ekki fleiri svekktir einstaklingar í samfélaginu sem þjóðin getur gert smá greiða? Hverjum eigum við að klekkja á næst?
Kveðja
Konni

Förum að ráðum Jóhannesar

2007-05-11T09:02:00.001Z

Nú er Jóhannes í Bónus búinn að gefa línuna. Ég kaupi inn til heimilisins í Bónus og er Jóhannesi óendanlega þakklátur fyrir lágt vöruverð. Þetta lága vöruverð hefur gert mér kleift að nota restina af peningunum mínum í menningu, nýtt hljóðfæri og sinna ýmsum góðverkum. Ég vil geta þess sérstaklega að ég gaukaði hundraðkalli að rúmenskum harmónikkuleikara á Laugaveginum í vetur. Ég man hvað ég gladdist með öllum Héraðsbúum þegar fréttist að Bónus ætlaði að opna verslun á Egilsstöðum. Þá var kátt á hverjum bæ. Bónus hefur sannarlega auðgað mitt líf. Takk fyrir það og ég ætla svo sannarlega að fara að ráðum Jóhannesar. Það er líka búið að fara illa með hann og hans fyrirtæki síðustu misseri. Gangi honum vel.
Kv.
Konni

Lögreglan stendur sig með prýði

2007-05-09T10:51:00.000Z

Vinir Konna muna örugglega vel eftir því þegar harmónikkufélag nokkurt á landsbyggðinni hafnaði tónverki sem hann hafði sent til flutnings í sérstaka harmónikkulagakeppni á Egilsstöðum.
Síðan þá hefur Konna verið í nöp við harmónikkuleikara hvar sem er í heiminum. Það gladdi því Konna mjög er lögreglan tók sig til í gær og smalaði saman rúmenskum harmónikkuleikurum sem dvalist hafa á landinu að undanförnu og sendi þá til síns heima. Við Íslendingar höfum svo sannarlega ekkert að gera við fleiri harmónikkuleikara. Ég styð eindregið öryggisaðgerðir lögreglunnar gagnvart útlendum harmónikkuleikurum og væri jafnvel til í að kjósa Frjálslynda flokkin til að koma í veg fyrir frekari heimsóknir útlendinga sem kunna á harmónikku.
Kv.
Konni

Bindi og sinfóníutónleikar

2007-05-04T23:37:00.000Z

Konni fór á alveg frábæra sinfóníutónleika áðan og nú voru engar feilnótur slegnar í klæðaburði eins og á síðustu tónleikum. Jakkaföt og bindi voru það og hvítvín fyrir frúna í hléi. Hljómsveitin spilaði frábærlega vel. Bindið gerði hins vegar gæfumuninn. Þarna voru reyndar mjög margir vel klæddir karlar og enn fleiri vel klæddar konur. Bindi og Beethoven/Brahms fara vel saman. Reyndar var ég að heyra það í útvarpinu að bindi geti verðið smitberar. Einhver rannsókn sem gerð var í Tælandi gaf það til kynna að bindi séu sjaldan þvegin. Læknar ættu því alls ekki að bera bindi er þeir fara milli sjúklinga á stofugangi. Bakteríur og veirur eins sjúklings geta loðað við bindið og smellt sér á næsta sjúkling sem síðan gefur frá sér smit á bindi læknisins sem hoppar svo á þriðja sjúklinginn. Þannig gengur þetta koll af kolli þangað til læknirinn hefur smitað allan spítalann með bindinu. Reyndar skyldi maður ætla að þetta væri atvinnuskapandi fyrir lækna.
Þá er betra að vera með slaufur eins og karlkyns meðlimir Sinfóníuhljómsveitar Íslands. Það er mjög ólíklegt að bakteríur og veirur hoppi á milli þar á bæ. Allavega voru engin veikindamerki á meðlimum hljómsveitarinnar í kvöld. Hins vegar slitnaði strengur í sellói en tæpast verður það rakið til hálstaus hljómsveitarmeðlima.
Kveðja,
Konni

Draumurinn um græna hermannajakkann

2007-05-04T08:26:00.000Z

Ég fór á laugardaginn í skranbúðina sem er að selja leifar bandaríska hersins í gamla Blómavali. Mig langaði í almennilegt herdót til minningar um herinn í Keflavík. Konni hefur alltaf verið veikur fyrir herdóti síðan hann stundaði hermannaleiki í Norðurmýrinni í gamla daga og horfði á Kanasjónvarpið hjá Maju frænku. Konni öfundaði alltaf kunningja sinn sem átti alvöru bandarískan herhjálm. Móðurbróðir minn átti líka safn ýmissa merkja sem hermenn skreyttu sig með og var það flott. Annars langaði Konna á menntaskólaárunum óendanlega mikið í grænan hermannajakka. Nokkrir eðaltöffarar í MH áttu einmitt slíka jakka. Alltaf fór það samt þannig að Sölunefnd varnaliðseigna átti aldrei réttu stærðina svo draumurinn um jakkann rættist ekki.
Konni fór sem sagt í skransöluna til að verða sér úti um hermannahjálm eða eitthvert almennilegt herdót ... eða kannski bara grænan hermannajakka. Hvílík vonbrigði! Í skransölunni var ekkert sem minnti á her nema kolryðgaðir bílar merktir US Navy.
Þar voru grútskítugir lazy-boystólar, skrifborð í röðum, borðstofuhúsgön í tonnum, hjónarúm í stöflum, einn nuddbekkur og slatti af líkamsræktartækjum.
Reyndar var þarna rammgerður peningaskápur sem mig langaði dálítið í ... en Konni hefur bara því miður ekki not fyrir slíka mublu.
Enginn hjálmur, ekkert herdót enginn hermannajakki!
Hvað var herinn eiginlega að gera hérna?
Kveðja,
Konni

Allir karlar verða að kunna að hnýta bindi

2007-04-27T14:24:00.000Z

Eitt það mikilvægasta fyrir hvern einasta karl er að kunna hnýta bindishnút. Faðir minn kenndi mér þá list strax á unga aldri og hefur það nýst mér síðan. Konni kann meir að segja að hnýta slaufu og er það enn meiri list.
Hálsbindi er afar mikilvægt ef karlmaður ætlar sér að vera vel klæddur. Þetta sá Konni svart á hvítu síðastliðið fimmtudagskvöld. Það kvöld gerði Konni þá skissu að fara bindislaus á Sinfóníutónleika. Þegar á tónleikana kom blasti við Konna eigandi dýrustu herrafataverslunar landsins klæddur á heimsmælikvarða og að sjálfsögðu með bindi um hálsinn. Þá sá Konni að bindislaus var hann eins og buxnalaus maður. Það er orðin einhver lenska meðal karla hér á landi að ganga um bindislausir í jakkafötum. Þetta er ekki smart. Sennilega eru menn að reyna að vera frjálslegir. Við karlar eigum að taka þá sem hafa vit á klæðaburði, sbr. fyrrnefndan eiganda dýrustu tískuverslunar landsins, til fyrirmyndar og ganga með bindi.
Það er mjög mikið vandamál ef karlar kunna ekki að hnýta bindi. Verða þeir þá að leita á náðir vina og kunninga eða jafnvel eiginkvenna. Ég segi nú ekki að þetta sé jafn alvarleg vandamál og lesblinda eða getuleysi en það jaðrar við.
Ég hvet alla karla sem ekki kunna þessa list að nema hana hið fyrsta. Bindishnýtslu má auðveldlega læra. Ef Konni getur lagt sitt af mörkum þá mun hann veita ókeypis ráðgjöf hvenær sem er og hvar sem er.
Vonandi mun hæstvirtur frambjóðandi í 7. sæti Vinstri grænna í Norðurlandsumdæmi eystra nýta sér það.
Kv. Konni

Hvað ef grænt yrði blátt og blátt yrði grænt?

2007-04-22T15:32:00.000Z

Til að ljúka við þessar pælingar mínar um útlit og traust langar mig til að velta því fyrir mér hvað myndi gerast ef Sjálfstæðismenn færu að lopapeysast eins og Vinstri grænir og Vinstri grænir færu að jakkafatast eins og Sjálfstæðismenn. Reyndar verður að taka fram eins og allir vita að útlitsmál flokkanna eru kannski ekki alveg svona svart og hvít. Ég hef t.d. ekki séð neinn Vinstri grænan í lopapeysu nýlega. Þar á bæ eru karlar almennt í jakkafötum og með bindi.
En ég veit að lesendur átta sig á hvað ég er að meina. Konni hefur ekki tekið klæðnað kvenna út á sama hátt. Kannski hafa þær frjálsari hendur?
Með útliti og klæðaburði eru frambjóðendur að höfða til sinna hópa. Þeir eru að höfða til fólks sem er með svipaðan smekk í hugsun og vilja samsama sig við stíl síns flokks. Sumum fannst t.d. töff að vera á Trabant í gamla daga á meðan öðrum fannst það alls ekki töff. Það voru meiri líkur á því að Trabanteigandi kysi Alþýðubandalagið heldur en Sjálfstæðisflokkinn. Þeir sem nú til dags eiga nýjan Volkswagen Golf með álfelgum eða Benz með álfelgum eru miklu líklegri til að Kjósa Sjálfstæðisflokkinn vegna þess að Sjálfstæðisflokkurinn passar miklu betur við Golfinn og Benzinn en t.d. Frjálslyndir eða Vinstri grænir. Vinstri grænir eiga miklu frekar látlausa fjölskyldubíla ekki splunkunýja en samt ekki endurunna.
Framsóknarmenn eru í augljósum vanda. Því fólki sem finnst töff að vera í Framsókn, einkum bændum og landsbyggðarfólki, fækkar alveg hrikalega ört. Þeir eru líka svo líkir Sjálfstæðimönnum og Samfylkingarfólki að kjósendur taka ekki eftir þeim. Framsóknarmenn vantar útlitslega sérstöðu ... vantar lit. Þeir skarta reyndar grænum lit að venju en hann nær bara ekki í gegnum þann bláa og þann rauða og græni litur Vinstri grænna ber með sér annað yfirbragð sem nær til fólks. Þeir skarta á einhvern hátt þroskaðri og trúverðugri grænum lit.
Það eru litirnir sem fólk tekur mark á, útlitið. Ef flokkarnir tækju sig nú saman og breyttu um stíl yrðu kjósendur kolruglaðir. Grænt yrði blátt og rautt yrði grænt.
Nú finnst mér að flokkarnir ættu að ráða Konna sem sérstakan stílista fyrir komandi kosningar ... gegn vægu gjaldi auðvitað.
Kveðja.
Konni

Kjósum hina velklæddu

2007-04-20T08:21:00.000Z

Síðasti pistill hefur valdið Konna nokkru hugarangri. Var Konni plataður
eða ekki? Álitsgjafar síðunnar eru mjög misvísandi.
Reyndar gekk Konni aldrei svo langt að borða grænan banana með
hýðinu en það var eingöngu vegna þess að sá sem veitti Konna þessar
upplýsingar var ekki trúverðugur. Það er einmitt það sem veldur
hugarangrinu. Af hverju er venjulegur strákur sem sinnir skyldustörfum í
verslun ekki trúverðugur? Ef þetta hefði verið stelpa hefði
trúverðugleikinn aukist til muna.
Nú til dags er trúverðugleiki sumra stétta byggður upp á markvissan hátt.
Tökum til dæmis allan viðskiptabransann. Byrjendur sem ráðnir eru til
fyrirtækis fá strax birta af sér litla mynd í einhverju viðskiptablaðanna.
Þar er tíundaður ferill og menntun sem oft er, þrátt fyrir byrjanda, býsna
margslunginn. Svo koma jakkafötin og draktirnar og við fáum umsvifalaust
traust á svo vel menntuðu, margsigldu og lífsreyndu fólki sem þrátt fyrir
ungan aldur er komið í áhrifastöðu hjá fjármálafyrirtæki. Starfsfólk
viðskiptaheimsins kemur í Séð og heyrt þegar bankarnir halda árhátíðir eða
gala-veislur á borð við Stefnumót við stjörnurnar. Auglýsingar í blöðum
sýna þetta fólk alvarlegt í bragði vakandi yfir hag bankans, landsins og
allra Íslendinga. Svona fólk getur selt hverjum sem er hvað sem er.
Þetta er traust, hámenntað og umfram allt fólk með lúkkið í lagi og þið
getið verið viss um að það segir ekki miðaldra manni að borða græna banana
með hýðinu.
Nú eru einmitt að birtast heilsíðuauglýsingar frá stjórnmálaflokkunum með
fallegum myndum af frambjóðendum. Konni ráðleggur ykkur að skoða þessar
myndir vel. Hverjir koma best fyrir? Hverjum treystið þið best til að bera
hag okkar allra fyrir brjósti. Allt þetta sést á myndunum. Einhverjum
sérvitringnum kann að þykja það fullgilt að bjóða sig fram til Alþingis í
flauelsbuxum og lopapeysu en við Íslendingar viljum almennt fólk í
jakkafötum og dröktum. Hefði strákurinn í 10-11 verið í jakkafötum er
aldrei að vita nema Konni hefði bitið í grænan banana ... í einrúmi. Veika
hlið stráksins var hettupeysan. Konni ráðleggur lesendum að kjósa fólk sem
engar líkur eru á að reyna að telja ykkur trú um að borða græna banana með
hýðinu. Til þess að forða misskilningi þá er Konni ekki endilega að tala
um Vinstri græna þó þeir séu með heilsufæðislegaútlítandi konu framarlega
í flokki.
Kjósum hina velklæddu.
Kv.
Konni

Af hverju treystir Konni ekki starfsmönnum Tíu - ellefu?

2007-04-16T22:26:00.000Z

Konni er sólginn í banana og í gær ætlaði hann að kaupa slatta í Tíu-ellefu. Strákur einn, starfsmaður verslunarinnar, var að hlaða bönunum á stand en Konna til hrellingar voru bananarnir sem komu upp úr kassa stráksins fagurgrænir ... vanþroska bananar. Konni sagði sem svo við strákinn að þessir bananar yrðu ekki borðaðir alveg á næstunni. En þá sagði stráksi að þetta væri einmitt rétta þroskastig banana til að borða þá með hýðinu. Með hýðinu hváði Konni. Þá fullyrti strákurinn og var sérlega sannfærandi að það sé einmitt sérlega gómsætt og hollt sé að borða fagurgræna banana ... með hýðinu.
Hverju á maður að trúa?
Ef þetta hefði verið heilsufæðislegaútlítandi kona í einhverri lífrænni heilsubúð hefði Konni tekið hana alvarlega, farið heim og borðað grænan banana með hýðinu. En af því að þetta var barar strákur í Tíu-ellefu þá datt Konna ekki í hug að taka mark á ráðum hans. Eru þetta fordómar?
Var strákurinn að grínast?
Ef einhver lesandi er til í að gera tilraun með að borða fagugrænan banana með hýðinu skal Konni borga bananann.
Kveðja,Konni

Litlir kassar á Kirkjusandi

2007-04-12T23:29:00.000Z

Þeir voru sannspáir Þokkabótarmenn þegar þeir sungum um litlu kassana forðum. Það er eins og þeir hafi séð fyrir nýju höfuðstöðvar Glitnis sem nú eiga að rísa á Kirkjusandi. Samkvæmt mynd sem birtist í Morgunblaðinu af þessum svokölluðu höfuðstöðvum eru þær bara þyrping húskassa sem hver krakki hefði getað rissað upp. Þetta er víst einhver verðlaunaútfærsla danskrar arkitektastofu. Hvílíkt andleysi! Hvert stefnir arkitektúr? Stefnir hann að litlum kössum hingað og þangað um bæinn. Ef flugvallarsvæðið verður byggt upp á þennan hátt erum við fagurfræðilega miklu betur stödd með það eins og það er. Hleypum allavega ekki dönskum verðlaunaarkitektum í það.
Þegar væntanlegar höfuðstöðvar Glitnis eru skoðaðar betur líkjast byggingarnar í þyrpingunni mjög peningatanki Onkel Jóakims í Andrési Önd.
Kannski er ekki vanþörf á því Glitnir græðir svo rosalega þessa dagana.
Já, þeir voru framsýnir félagarnir í Þokkabót enda af Seyðfirsku bergi brotnir.
Kveðja,
Konni

Konni gefur atkvæði sitt til að bjarga þjóðinni

2007-04-09T13:28:00.001Z

Nú hefst kosningabaráttan.
Tíu, níu, átta, sjö, sex, fimm, fjórir, þrír tveir, einn og BANG. Baráttan er hafin.
Eftir fjórar vikur fær Konni í hendur kjörseðil sem hann veit ekkert hvað á að gera við. Á fólk eins og Konni að hafa kosningarétt? Getur verið að fullt af fólki ætti bara alls ekki að hafa kosningarétt einfaldlega vegna þess að það hefur ekki vit á stjórnmálum. Konni þekkir fullt af fólki sem hefur mikið vit á því hvernig stjórna eigi landinu. Slíkt fólk á hiklaust að fá að kjósa. Það er eindregið í sinni afstöðu. Öll pólitísk skoðun önnur en sú sem það sjálft aðhyllist er nánast landráð eða aðför að fjölskyldunni eða framförum, náttúrunni, jafnrétti eða heimsfriði.
Konni segir bara jamm og já og fyllist vanmætti. Af hverju getur hann ekki hugsað svona djúpt og reiknað skák stjórnmálanna jafn listilega út?
Konni er að hugsa um að gefa atkvæði sitt einhverjum sem hefur raunverulega vit á stjórnmálum. Atkvæði í höndum Konna er sama og byssa í höndum óvita. Skotið getur farið í hvaða átt sem er.
Sumir eru svo rausnarlegir að gefa úr sér líffæri svo bjarga megi lífi annarrar manneskju. Það er göfug og mikil gjöf.
Miðað við það er bara smámál að gefa eitt atkvæði til að bjarga þjóð.
Kveðja
Konni

Fordómar Vantrúar

2007-04-07T09:55:00.000Z

Félag sem kalla sig Vantrú, samtök trúleysingja, stóð fyrir bingói á Austurvelli á föstudaginn langa. Það mun víst vera bannað samkvæmt helgidagalöggjöf Þjóðkirkjunnar að stunda bingó þennan dag. Með löggjöfinni finnst Vantrúarmönnum að brotið sé gegn athafnafrelsi. Í Textavarpinu segir að félagið ætli sér að berjast gegn boðun hindurvitna í samfélaginu. Ekki er hægt að skilja þetta á annan veg en hindurvitnin sem Vantrú ætli sér að berjast á móti sé hin kristna trú. Ef hópur manna hefði farið á Austurvöll til að berjast gegn múslimum hefði allt orðið vitlaust í samfélaginu og viðkomandi hefðu verið sakaðir um fordóma, mannvonsku og rasimsa. Skyldi vandamálaherdeildin rísa upp á afturlappirnar og saka Vantrú um fordóma gagnvart kristnu fólki? Konni er vantrúaður á það.
Kveðja,
Konni

Eílíft stuð í þessu lífi eða því næsta

2007-04-06T23:24:00.000Z

Umsjónarmaður keppninnar um fyndnasta mann Íslands og fleiri sjá ekkert athugavert við það að föstudagurinn langi sé sami stuð-dagurinn og allir hinir dagarnir í árinu. Það er greinilega mikil fórn að slappa af einn dag á ári og ef til vill leiða hugann dálítið að tilefni hans.
Nei, umsjónarmaður keppninnar segir á sinn hrokafulla hátt:

Ég sé ekkert óviðeigandi við að fyndnasti maður Íslands sé krýndur á sama degi og Kristur var krýndur sinni kórónu. Ég er viss um, að hann hefði komið á keppnina sjálfur hefði hann ekki verið örlítið bundinn.

Það virðist afar óþægilegt fyrir suma að lifa föstudaginn langa af. Við þurfum stuð hvern einasta dag. Leiðist fólki? Af hverju er sumt fólk hrætt við að pæla aðeins í eilífðarmálunum? Það er meir eða minna búið að afhelga jólin og nú er næsta takmark stuðmanna Íslands að sjá til þess að enginn þurfi að leiða hugann að Jesú á krossinum á föstudaginn langa. Slíkar hugsanir gætu kannski truflað stuðið og gleðina rétt sem snöggvast. Í hvaða liði er umsjónarmaður keppninnar um fyndnasta mann ársins? Hví ríkir þessi Jesú-hræðsla?
Verum svo öll í stuði með Guði og í botni með drottni.
Gleðilega páska
Kv.
Konni

Ætlum við virkilega að lifa á fjallagrösum?

2007-04-01T15:30:00.000Z

Konni fór í Laugardalslaugina í morgun. Nokkuð hressileg umræða í heita pottinum. Kona og maður á besta aldri rifust þar af kappi um álver. Maðurinn var auðvitað talsmaður álvers og virkjana en kona varðist fimlega enda á bandi þeirra sem vilja fara ögn hægar í álmálin. En haldið þið ekki að gamla fjallagrasaklisjan hafa ekki skotið þarna upp kollinum því þegar karlinn var kominn út í horn (reyndar er nú potturinn hringlaga) þá hóf hann gagnsókn með þeirri snjöllu spurningu hvort við ætlum þá bara að lifa á fjallagrösum og ganga í lopapeysum niður Laugaveginn. Kona svaraði þessu af fullum krafti og hló að karlinum. Sagði að þetta væri gamalt bragð sem ekki dygði lengur. Við það færðist karlinn allur í aukna og það síðasta sem ég heyrði af viðureign þeirra var að karlinn öskraði að konan væri lygari. Þá var ég nú reyndar kominn í annan pott. Konni er reyndar búinn að fá nóg af öskrum og illindum vegna umræðna um virkjana og álmál. Ástandið fyrir austan í aðdraganda Kárahnjúkavirkjunar var ekki alltaf skemmtilegt. Konni hitti mann að austan um daginn sem beitti sér mjög gegn öllum þeim framkvæmdum. Hann fullyrti að hann hefði alltaf verið látinn borga meira en aðrir hjá ýmsum einkareknum þjónustufyrirtækjum á Egilsstöðum. En nú hefur áliðnaðurinn náð kverkataki á Austurlandi. Hvernig verður brugðist við þar ef Alcoa hótar að loka álverinu eftir 40 ár ... nema það fái að stækka. Sem betur fer er atvinnuástand á Suðvestuhorninu betra og fjölbreyttara. Ekkert eitt fyrirtæki hefur þar tangarhald á atvinnulífinu eins og nú mun gerast á Austurlandi. Vonandi að það ævintýri gangi vel. Þetta voru góð úrslit í Hafnarfirði í gær nú gefst tími til að pæla.

Langir og leiðinlegir íþróttapakkar

2007-03-26T08:26:00.001Z

Jæja, það var eitt fyrsta verk þeirra hjá RÚV ohf. að undirrita samning við menntamálaráðherra um að sú ágæta stofnun skuli gæta kynjajafnréttis í íþróttafréttum. Það er svo sem gott og blessað. Íþróttir hafa alltaf einhvern óskiljanlegan forgang í fjölmiðlum umfram allt annað sem maðurinn tekur sér fyrir hendur. Um daginn var í tíu fréttum sagt frá því að landsþekktir listamenn hefðu heimsótt Fjarðarbyggð og jafnvel boðið börnum upp á kennslu í list sinni. Ekkert var minnst á í texta fréttarinnar hverjir þessir listamenn voru en myndin með fréttinni upplýsti að þarna voru Diddú og Jónas Ingimundarson á ferðinni. Þessi frétt fékk sennilega svona tíu sekúndna umfjöllun en á eftir henni kom svo auðvitað langur og leiðinlegur íþróttaPAKKI eins og það er víst kallað.
Íþróttapakki! Það er látið líta svo út eins og það sé einhver gjöf til þjóðarinnar að sýna tíu mínútur frá körfubolta kvenna.
Hvernig væri að RÚV og menntamálaráðherra undirrituðu samning um að menning fengi jafn mikla umfjöllun í fréttum fyrirtækisins eins og íþróttir? Yrði ekki verulegur fengur af slíkum samningi? Hvenær fáum við langan menningarpakka?
Konni er pirraður á íþróttafréttum, íþróttamönnum og eilífum golffréttum af Birgi Leif Hafþórssyni á hinum og þessum mótum út um hvippinn og hvappinn þar sem hann er ýmist á pari eða undir pari eða yfir pari eða komst í gegnum niðurskurð eða komst ekki í gegnum niðurskurð eða golfsetinu hans var stolið.
Ætli RÚV ohf. og menntamálaráðherra skrifi svo ekki undir fleiri íþróttasamninga? Hvernig væri þá að gera samning um að jafnræði skuli vera milli landshluta í íþróttafréttum?
Nei annars, þetta var slæm hugmynd ... þá fengjum við yfir okkur endalausar fréttir af borðtennismótum á Raufarhöfn eða glímumótum í Bolungarvík eða golfmótum byrjenda, sundmótum í Vík í Mýrdal og bandýmótum í Reykjavík. Það yrðu langir og óbærilegir íþróttapakkar.
Getur ekki eitthvert framboð tekið það upp á sína arma að losa okkur við íþróttapakka.
Kv.
Konni

Fálkalundur - á stall með máttarstólpa samfélagsins

2007-03-21T12:39:00.000Z

Konni heyrði í fréttunum að áhugi væri á því að reisa styttu af Guðmundi Jaka í Breiðholti. Þar lýst mér vel á. Hann átti víst sinn þátt í uppbyggingu hverfisins.
Reyndar finnst mér að reisa mætti miklu fleiri styttur af máttarstólpum þjóðfélagsins. Styttur eru fallegar og augnayndi og jafnvel ljótar styttur eru hvarvetna til prýði.
Það er vaxandi kynslóðum nauðsynlegt að átta sig á því að margar kynslóðir hafa lagt grunninn að því samfélagi sem við búum í. Margir einstaklingar hafa skarað fram úr, hver á sínu sviði. Þetta fólk á allt skilið komast á stall.
Ég hef alltaf verið hrifinn af Fálkaorðunni. Þar fá hvunndagshetjur stundum sína réttmætu viðurkenningu fyrir framlag til samfélagsins. Oft ber lítið á þessu fólki því ekki skartar það orðunni nema mesta lagi á 17. júní. Þess vegna fékk Konni hugmynd.
Hugmyndin er sú að hver einasti handhafi Fálkaorðunnar fái reista af sér bronsstyttu. Styttunni verði komið fyrir í sérstökum lundi í heimasveitarfélagi þess sem orðuna hlýtur. Nefna mætti slíka lundi Fálkalundi og yrði hver lundur höfuðprýði og stolt sveitarfélagsins. Slíkir höggmyndagarðar, um allt land, hefðu mikið menningarlegt og sögulegt gildi. Stytturnar yrðu síðan búnar þeirri tækni að geta talað þannig að með því að ýta á hnapp myndi styttan, með rödd fyrirmyndarinnar, segja frá þeim afrekum sem orðið hefðu til þessa að hún fékk Fálkaorðuna.
Það yrði gaman að ýta á hnapp á Guðmundi Jaka og fá nokkrar sögur úr verkfallsbaráttunni og Breiðholti. Það er bara verst hversu hátt er upp í Jón Siguðsson.
Kveðja,
Konni

Listaháskóli Austurlands

2007-03-18T12:52:00.001Z

Um helgina auglýsti álverið á Reyðarfirði eftir trommuleikara. Ég hélt kannski að hlutverk hans yrði það sama og trommuleikaranna á galeiðum Rómverja þ.e. slá taktinn fyrir þrælana sem réru skipunum. Er Konni leit betur á auglýsinguna sem var römmuð inn með andlistmyndum skælbrosandi álversstarfsmanna sá hann að trommuleikaranum var ætluð staða í árshátíðarhljómsveit álversins. Já það er greinilega gaman að vinna í álveri. Ef miðað er við aðrar starfsmannaauglýsingar fyrirtækisins er mér hulið hvenær álið verður brætt. Sennilega þegar árshátíðarhljómsveitin tekur pásur eða milli móta í skákklúbb fyrirtækisins eða milli laga hjá álverskórnum eða í hálfleik hjá knattspyrnuliðum Alcoa. Álverið á Reyðarfirði er sannarlega menningarfyrirtæki. Konni er reyndar dálítið svekktur að fá ekki boð um að verða fyrsti flautuleikari álversins því fyrst það hefur metnað til að koma sér upp danshljómsveit hlýtur það að ætla tónlistarmönnum fyrirtækisins að róa á ögn listrænni mið. Alcoa verður að koma sér upp sinfóníuhljómsveit. Alcoa verður líka að koma sér upp leikhúsi og Alcoa verður að koma sér upp listmálurum og ljóðskáldum. Ég vissi alltaf að álverið myndi lyfta atvinnu- og menningarlífi á Austurlandi í hæðir. Það réttlætir svo sannarlega eyðilegginguna á heiðum uppi, rafmagnsgirðingarnar sem þvera Fljótsdal og Skriðdal, endursköpun Lagarfljóts og Jökulsár og svona smá einelti.
Já, Austurland verður í framtíðinni svo sannarlega rammað inn af brosandi og glöðum starfsmönnum Alcoa sem una glaðir við listsköpun sína í faðmi álbræðslunnar. Trommuleikarinn er vonandi bara upphafið hjá þessum vísi að Listaháskóla Austurlands.

Konna boðið í bíó

2007-03-15T19:50:00.001Z

Næst neðsti frambjóðandi á lista Samfylkingarinnar í Norðausturkjördæmi færði Konna í gær fyrsta áróðursbæklinginn fyrir væntanlegar kosningar. Vorið er sem sagt í nánd.
Þessi bæklingur gladdi Konna mikið enda mjög fögur fljóð í lokkandi stellingum sem prýddu framhlið bæklingsins og það sem meira var, þær buðu í bíó. ÞÉR ER BOÐIÐ Í BÍÓ! stóð stórum stöfum.
Konni hefði ekki hikað við að eiga skemmtilega bíóstund með þessum konum ef hann hefði ekki sem betur fer áttað sig á því að bíóferðin var ekki öll sem hún var séð. Á bakhlið bæklingsins, sem ekki var prýdd lokkandi fljóðum, stóð nefnilega að bíóferðin væri í raun fundur um umhverfismál.
Fundur um umhverfismál!! Ó mæ ...
Fundurinn verður hins vegar haldinn í Nýja bíói á Akureyri og boðið upp á mynd eftir Al Gore, það var þá öll bíóferðin. Þetta voru mikil vonbrigði fyrir Konna því miðað við nýjustu túlkanir á myndefni auglýsingabæklinga þá fannst Konna sem þessar Samfylkingarkonur byðu upp á eitthvað meira krassandi í bíó en fund um umhverfismál. Þessar fögru konur ætluðu sem sé að véla kjósendur á fölskum forsendum í bíó og það á mynd eftir Al Gore, hefði það nú verið mynd með Ole Söltoft hefði Samfylkingin kannski krækt sér í atkvæði.
Þannig eru nú stjórnmálin orðin ... ekkert nema kynþokki ... þar erum við karlar veikir fyrir líkt og konur sem hópast nú til vinstri í einum hvínandi grænum ... en það er nú sennilega vegna kynþokka málefnanna.
Kveðja,
Konni

Enginn fiskur undir steini

2007-03-14T20:16:00.000Z

Þá er nóg komið af skrifum um menningarmál á Austurlandi. Þar er greinilega margt menningarlegt í deiglunni. Austfirðingar verða bara að vera duglegir að sækja þessa atburði og láta okkur hin, sem búum utan fjórðungs vita af því að þar sé enginn fiskur undir steini eins og ku hafa verið í ákveðnu bæjarfélagi suður með sjó hér í dentíð. Ef enginn nema heimamenn vita af menningaratburðum á Austurlandi þá er í hugum okkar hinna ekkert gerast þar. Við vitum af menningu í New York af því að okkur berast fréttir úr heimsborginni. Kannski er það svolítið glannalegt að nefna New York í sömu setningunni og Austurland en það er bara þannig að fréttir eru til marks um lífsmark. Ef ekkert fréttist af Austurlandi nema sögur af gangi mála við framkvæmdir þá er í vitund þjóðarinnar bara ekkert að gerast þar nema þessar framkvæmdir. Reyndar standa starfsmenn fjölmiðla sig ágætlega. Í Mogganum er oft ágætis umfjöllun og fréttir. Svæðisútvarpsmenn eru líka mikilvægir. Góðar og skemmtilegar fréttir bárust til dæmis nýlega af grafreit í kjallara íbúðarhúss út í Tungu eða Hlíð og munkaklaustur er í farvatninu á Reyðarfirði. Auk þess frétti ég af ístöltskeppni á Eiðavatni með Jónínu Rós sem kynni. Þetta var allt til vitnis um lífsmark ... ja, nema kannski fréttin um grafreitinn.
Það skiptir máli að láta vita af sér, því annars veit enginn hvort þú sért lífs eða liðinn.
Kv.
Konni

Fyrir hvað vill Austurland standa?

2007-03-10T13:44:00.001Z

Ég þakka viðbrögð við síðasta pistli. Tóta settist niður og setti saman ágætan pistil og Rannveig benti mér á að listi minn yfir menningarstofnanir sem skipta máli á Austurlandi var ekki tæmandi. Það var gott. En nú þegar hinum verklega þætti endurreisnar Austurlands er nánast lokið hljóta sveitastjórnarmenn og íbúar að fá svigrúm til að huga að uppbyggingu kraftmikils menningarsamfélags. Þá er ég að meina að menning verði jafn mikilvæg útflutningsgrein og álið. Ég hef verið að spyrja samstarfsfólk mitt hér í Reykjavík, sem ekki þekkir til á Austurlandi,hvort það muni eftir einhverju eða kannist við eitthvað menningartengt sem þaðan er runninið. Enginn mundi eftir neinu nema Keith Reed skaut upp kollinum. Ég hef verið að tala við ungt listafólk sem býr nú hér í Reykjavík og á rætur sínar að rekja til Austurlands af hverju það flytji nú ekki austur og taki til hendinni á þeim sviðum sem það hefur þekkingu á. Þetta unga fólk sér enn sem komið er ekki kostina við það það vill heldur búa í höfuðborginni. Reyndar eru undantekningar frá þessu sbr. forstöðukona Skaftfells er borinn og barnfæddur Vallamaður og forstöðumaður Gunnarstofnunar er Héraðsmaður.
Það skiptir okkur Íslendinga máli að eiga Laxness, Ólaf Elíasson, Björk, Sigurrós, Austfirðinginn Stefán Höskuldsson, Helga ballettdansara og aðra listamenn sem brotist hafa til heimsfrægðar. Þetta skiptir máli fyrir sjálfsvitund okkar allrar. Hugsið ykkur Íslendinga án þessa fólks. Hugsið ykkur ef enginn Íslendingur hefði nokkurn tímann gert neitt sem skipti máli fyrir aðrar en okkur sjálf. VilhjálmurEinarsson skiptir Austurland miklu máli því hann er Silfurmaðurinn.Vilhjálmur skiptir máli fyrir sjálfsmynd þeirra sem á Austurlandi búa sömuleiðis Gunnar Gunnarsson rithöfundur. Það sem meira er, þeir skipta alla þjóðina miklu. Það hlýtur að skipta máli fyrir þennan landsfjórðung að geta sýnt öðrum landsmönnum og ef til vill umheiminum að þar fari fram vitrænt starf sem skipti máli. Af hverju getur Austurland ekki orðið jafnöflug menningarbræðsla eins og álbræðsla. Í Lesbók Morgunblaðsins í dag er viðtal við bandaríska rithöfundinn Jonathan Franzen. Í kynningu er hann sagður ein umtalaðasti rithöfundur sinnar kynslóðar. Jonathan segir að fyrir sér sé Ísland Sjálfstætt fólk og Sykurmolarnir. Fyrir hvað villAusturland standa?
Svo vil ég taka fram til að forðast misskilning að í öllum sveitum og líka í Reykjavík er stunduð alþýðumenning sem er vissulega gríðarlega mikilvæg og skemmtileg. Við hana er ekkert að athuga. Konni hefur sjálfur tekið þátt í slíku og gerir enn og telur sig betri mann fyrir vikið. En menningarleg nýsköpun er samt það sem fleytir okkur áfram. Hvar værum við í dag án Bítlanna, SÚM eða Jóns Leifs? Danshljómsveit Eyþórs skiptir okkurÍslendinga ekki eins miklu máli þó hún sé góð.
Kv.
Konni

Er uppgangur á Austurlandi?

2007-03-08T23:01:00.000Z

Það er enginn vafi á því að það er uppgangur á Austurlandi. Byggingar þjóta upp á Egilsstöðum og víðar, margra tuga kílómetra göng eru grafin fyrir rennandi vatn í gegnum Fljótsdalsheiði. Línur eru lagðar, hafnir byggðar og álverið á Reyðafirði fer bráðum að mala gull.
Þrátt fyrir allt læðist að manni sá grunur að þetta sé allt og sumt. Allt og sumt kynnu einhverjir að spyrja ... er þetta ekki nóg?
Mitt svar er nei. Á Austurlandi er ekkert að gerast sem í frásögur er færandi utan þessar framkvæmdir. Það er nú það sorglega við þetta allt. Veislugleði verktakanna er svo mikil að uppbygging mannlífsins hefur gleymst. Menning er í besta falli á sama plani og fyrir uppgang. Uppgangurinnhefur ekki fært menn skrefinu nær kreatívu samfélgi. Auðvitað eru sett upp leikrit og einhverjar myndlistarsýningar. Kórar, hagyrðingar og harmónikkumenn koma saman og skemmta sér og öðrum. Það er hið besta mál. En það sem ég á við er það að enginn lítur á Austurland sem svæði þar sem fram fer menningarleg nýsköpun. Reyndar eru þar undantekningar á. Starfsemi Skaftfells á Seyðisfirði, Skriðuklausturs og mér sýnist Kirkjumiðstöðin á Eskifirði vera að gera sitt. Staðreyndin er samt sú að á Austurland er engin menningarleg uppspretta. Þar fer ekki fram nýsköpun sem skiptir máli fyrir Ísland. Næstum öll slík starfsemi fer fram í Reykjavík og í mesta lagi á Akureyri. Ástæðan kann að vera sú að allt unga fólkið fer burt. Að minnsta kosti sú tegund af ungu fólki sem er skapandi eða leitandi og ef til vill ögrandi. Það er einmitt slíkt fólk sem Austurland þarfnast sem mótvægi við framkvæmdasnillingana.
Kveðja,
Konni

Íþróttafréttamenn ...æ ææææ

2007-03-08T08:12:00.001Z

Það er tvennt sem fer mjög í tugarnar á Konna þessa dagana hvað fréttir
varðar. Það eru fréttir af fjármálaheiminum og svo íþróttafréttir. Konni
var á sínum tíma óforbetranlegur íþróttaáhugamaður en nú er öldin önnur.
Fréttir af íþróttum eru nefnilega mjög óþarfar og þróttafréttamenn
algjörlega óþarfir fréttamenn. Íþróttafréttamenn flytja fréttir af
ómerkilegustu íþróttakeppnum eins og um heimsviðburði sé að ræða. Jafnvel
Íslandsmót í körfubolta kvenna verður tilefni til þess að þeir setja sig í
þessar leiðinda æsingastellingar, hækka róminn og fara svo í þennan
óþolandi accelerando fasa sem endar með upphrópun eða gleðistunu yfir að
einhver hafi nú komið í mark á undan einhverjum öðrum á nýju
Austurlandsmeti. Hvað kemur okkur það við?
Hvað kemur mér við þó einhver Sigríður í einhverju körfuboltaliði úti á
landi hitti tíu sinnum í körfuna en tapar samt? Hvað kemur mér það við ef
einhver kylfingur dettur úr keppni á Spáni eftir niðurskuð, hvað sem það
nú er? Það þættu meiri tíðindi ef hann dytti úr keppni eftir umskurð. Hvað
kemur mér við þó einhver fótboltamaður í KR eða Val sé búinn að vera
meiddur á ökkla í tvö ár en sé nú loksins að ná sér á strik? Hvað kemur
mér það við þó West Ham sé að falla niður í fyrstu deild á Englandi? Sama
er mér. Hvað kemur mér það við hvort skíðamenn detti á rassinn í fyrri
umferðinni í heimsbikarmótinu Garmen Partsénkirkjen? Afrek almennings eru síðan algjörlega hunsuð. Um síðustu helgi fór fram Vasagangan í Svíþjóð. Þar var fríður hópur Íslendinga. Hvergi hef ég séð minnst á afrek þeirra í íþróttapistlum fjölmiðlanna.
Ég legg til íþróttafréttir verði eingöngu birtar í textavarpinu og í
prentmiðlum því þá sleppur maður allavega við íþróttafréttamennina.
Þó eru tveir íþróttafréttamenn sem mættu alveg halda velli á skjánum eða í
útvarpinu. Það eru þeir Sigurður Sigurðsson og Bjarni Felixson. Þeir tveir
bera höfuð og herðar yfir aðra kollega sína. Sigurður er reyndar allur
fyrir mörgum árum en það eru örugglega til gamlar upptökur með honum sem
mætti endurflytja. Ég hefði einnig mjög gaman af því að heyra Bjarna Fel
lesa upp úrslit úr ensku knattspyrnunni frá tímabilinu 1988-1999, árið sem
Liverpool vann ensku deildina síðast.
Kveðja,
Konni

Um neyðarlega útrás

2007-03-04T10:10:00.000Z

Um daginn skrifaði Konni pistil um kaup Íslendinga á West Ham. Svo virðist vera að þessi leikur þeirra með milljarða sé að verða eitt neyðarlegasta fyrirbæri svokallaðrar útrásar íslenskra auðmanna. Reyndar var frétt um það í blöðunum í gær að Bakkavararbræður séu nú ekki allir þar sem þeir eru séðir. Framkoma bræðranna við verkafólk sem starfar í verksmiðjum þeirra á erlendri grundu er kennd við nútíma þrælahald. Bakkavararbræður eru bara svo góðlegir menn af myndum að sjá, að ég trúi þessu ekki á þá.
En eigendur West Ham eru aldeilis í vondum málum því það er ekki nóg með að kaupa þeirra á félaginu hafi nú lyktað af leik með peninga þ.e. fjárhættuspili heldur logar allt félagið af slíkri iðju. Tveir leikmenn félagsins hafa þurf að leita sér hjálpar vegna spilafíknar og jafnvel í rútunni á leið í leiki er spilað upp á peninga. Okkar maður, stjórnarformaður West Ham, sem einu sinni bakaði Frón-kex hefði bara átt að halda sig við baksturinn því samkvæmt grein í breska blaðinu Observer á hann ekki sjö dagana sæla, einangraður frá leikmönnum, knattspyrnustjórinn í öngum sínum og ekkert blasir við nema fall um deild og stórtap á fjárfestingunni. Að kaupa fótboltafélag er ekkert annað en fjárhættuspil þeirra sem eiga svo mikla peninga að Lottóið dugar þeim ekki. Við hin fáum þó allavega smá útrás við að spila í Lóttóinu í von um fyrsta vinning ... dagslaun einhvers West Ham-leikmannsins.
Við föllum allavega ekki um deild þó við vinnum ekki ... bara nokkrir hundraðkallar hafa þá runnið óskiptir til íþróttamála. Er það ekki göfugt? Íþróttir eru svo mikil forvörn.
Kveðja,
Konni

Japanskur dónaskapur fyrir menningarvita

2007-03-02T08:08:00.000Z

Kvikmyndaklúbburinn Fjalakötturinn er nú að hefja göngu sína á ný. Það er hið besta mál ... eða hvað? Konni fór stundum á sýningar klúbbsins hér í denn. Miðað við bækling frá Fjalakettinum sem Konna áskotnaðist þá gæti bara verið gaman að fara í bíó á næstunni. Svo dæmi séu tekin af væntanlegum kvikmyndum þá verða allar myndir James Dean sýndar. Gefið verður yfirlit yfir rússneska kvikmyndasögu og sýndar áhugaverðar myndir frá Þýskalandi.
En vitið þið hvað?
Haldið þið ekki að nú í vor eigi að gefa bíóáhugamönnum og menningarspekúlöntum kost á að kynnast japönskum erótískum myndum. Í bæklingnum segir: Á sjöunda- og áttunda áratugnum var slíkt neyðarástand hjá stóru japönsku framleiðslufyrirtækjunum að risasteypurnar brugðu á það ráð að nýta sér nýlegan geira bleikra kvikmynda til að laða áhorfendur aftur í kvikmyndahúsin. Þessar kvikmyndir voru opinskáar, kynferðislegar og ljósbláar en aldrei jafn grófar og klám. Tilvitnun lýkur.
Hver dæmir svo hvað er klám og hvað er bara saklaust mennignarpornó?
Ég bara ætla að vona að það fólk sem barðist hvað harðast gegn dónafundinum á Hótel Sögu um daginn láti nú til sín taka og kynni sér vel þessar menningarmyndir og költfyrirbæri. Það er von Konna að þessi fyrirætlan Fjalakattarins verði ekki tekin neinum vettlingatökum og samtakamáttur femínista, Alþingis, Þjóðkirkjunnar, borgarstjórnar Reykjavíkur, íþróttahreyfingarinnar og félags púrítana verði virkjaður gegn þessum ljósbláu japönsku myndum.
Einnig hvetur Konni þessa sömu aðila að koma í veg fyrir að Ole Söltoft, sem frægur varð fyrir að leika í dönsku rúmstokksmyndunum, geti nokkurn tímann leikið hér lausum hala sem ferðamaður. Hver myndi vilja hitta Ole Söltoft í heitum potti í myrkri eða við Gullfoss eða Geysi? Hver veit nema Ole myndi þá grípa til kunnuglegra hvílubragða? Konna er ekki kunnugt um að íslensk glíma bjóði upp á öruggar varnir gegn svoleiðis fantaskap.
Hunsum Fjalaköttinn!
Bendi svo á þessa síðu fyrir alla áhugasama um Ole Söltoft.
Kveðja,
Konni

Gelding Laugarvegarins

2007-02-27T19:22:00.001Z

Konni er einlægur vinur Laugavegarins. Nú eru blikur á lofti. Borgaryfirvöld núverandi og sérstaklega fyrrverandi hafa haft uppi áform um niðurrif gamalla húsa í stórum stíl. Þetta niðurrif mun á endanum gera Laugaveginn að náttúrulausri götu. Gelding Laugavegarins var blessuð af því fólki sem Konni hélt að hefði smekk fyrir umhverfinu þ.e. R-listanum. Konni hélt að það hefði verið einmitt það fólk sem bjargaði Grjótaþorpinu og Bernhöftstorfunni. Kannski það sé vitleysa en allavega lagði R-listinn drög að geldingu götunnar.
Hvert förum við þegar við erum stödd í borgum eða litlum bæjum á erlendri grundu? Jú, við förum í gömlu bæjarhlutana. Jafnvel borgir sem voru sprengdar í tætlur í stríðinu hafa verið endurbyggðar í gömlum stíl. Við Reykvíkingar erum hins vegar orðnir svo samdauna slömmarkitektúrnum sem marka flest ný hverfi borgarinnar að enginn segir neitt þegar rústa á þeirri götu sem ætti að vera okkur hjartfólgnust. Reyndar hefur Konni smekklausa eigendur þessara lóða grunaða að þrýsta verulega á yfirvöld en þeir sem ráða eiga að vaka yfir velferð borgarinnar. Álíka slys er að verða að veruleika á gamla slippsvæðinu. Ef til vill er ástæðuna að finna í almennu sinnuleysi okkar og smekkleysi. Fagurfræði er okkur ekki í blóð borin það eru helst bókmenntirnar sem við Íslendingar kunnum eitthvað á.
Nýju hverfi borgarinnar eru í einu orði sagt ómanneskjuleg. Ég þekki konu sem flutti úr vesturbænum og upp í Grafarholt. Hún fékk sjokk. Hver fer í bíltúr eða göngutúr upp Grafarvog? Hver sækir sér andlega upplyftingu í Breiðholtið eða Kópavog? Svo ætla menn að rústa Laugaveginum.
Konni er reiður!
Kveðja
Konni

Framtíð bændastéttarinnar er tryggð

2007-02-23T22:26:00.000Z

Dónarnir ætla að hætta við Íslandsferðina. Íslendingar eru manna sniðugastir við að hrista af sér ósóma enda sómakær og kristin þjóð sem hefur boðorðin 10 að leiðarljósi. Dónarnir áttuðu sig ekki á þessu. Þeir héldu að við værum eins og aðrar þjóðir; orðin ónæm fyrir dónaskap. Á er Íslandi er ekki drýgður hór daginn út og daginn inn eins og í dónalöndunum. Ó, nei. Nú eru það femínistar sem fara í broddi fylkingar og hreinsa upp ósómann. Gott hjá þeim. Þær fara frá einni sjoppu til annarar, bókabúð úr bókabúð, storma um stórmarkaði og útskúfa öllum fjölmiðlum sem sýna svo mikið sem innanlærisvöðva af kvenkind. Þetta er gott.
Í beinu framhaldi af þessari vel heppnuðu aðgerð skulum við snúa okkur að öllum ferðamönnum sem lifa ókristilegu líferni. Við viljum til dæmis ekki fólk sem heldur ekki hvíldardaginn heilagann, heiðrar ekki föður sinn og móður, fólk sem stelur og fólk sem hugsar ljótar hugsanir. Burt með slíka ferðamenn.
Hverjir voru það svo sem áttu lokaorðið í þessu svæsna dónamáli?
Íslenskir bændur!
Þegar búið verður að leggja niður íslenskan landbúnað og við kaupum tómata og lambakjöt frá einhverju dónalandinu setjum við alla bændur í ferðamannavörslu. Bændakynið hefur í aldanna rás þróað með sér þann hæfileika að þefa uppi rollur og eftirlegukindur á heiðum uppi. Sá hæfileiki mun örugglega nýtast vel þegar þeir verða settir í að lúsleita að túristum í dónalegum hugleiðingum. Þá fyrst gæti nú orðið ansi fjörugt í réttunum.
Kveðja,
Konni

Hinn endanlegi raunveruleiki

2007-02-22T20:06:00.000Z

Nú er svolítið um liðið síðan Anna Nicole Smith gekk fyrir ætternisstapann. Þrátt fyrir það er hún ekki enn komin undir græna torfu. Fjölmiðlar fylgjast vel með gangi mála og birta bollaleggingar um næstu skref Önnu til himna. Það munu víst vera einhver formsatriði sem koma í veg fyrir að jarðarför geti farið fram en Konni kann ekki skil á þeim. Einmitt vegna þess að Anna er enn ofar moldu gefst nú kostur á því að framkvæma hinn fullkomna gjörning. Hann mætti kalla: Af moldu ertu komin. Þetta yrði einstakur gjörningur sem myndi ná athygli allrar heimsbyggðarinnar. Jafnvel Konni, sem ekki vildi horfa á myndbandið af Byrgismanninum hlaupa í skarðið, myndi fylgjast með af áhuga.
Af hverju er Anna ekki látin rotna í beinni útsendingu? Lík hennar gæti staðið uppi fyrir framan myndavélar svo við gætum fylgst með hvernig kynbomba verður að mold. Þetta hefur enginn séð fyrr með eigin augum. Gjörningurinn myndi verða í eðlilegu framhaldi af lífshlaupi hennar, fullkomna sýniþörfina. Hvaða raunveruleikaþáttur kæmist í hálfkvist við þennan?
Þegar kynbomban væri svo orðin að engu mætti jarða hana með pomp og prakt.
Á þessu mætti græða milljarða. Hvar eru spekúlantarnir núna?
Kveðja,
Konni

Varið ykkur á dónunum

2007-02-16T22:35:00.000Z

Einu sinni samdi Konni gamanbrag um konu sem seldi Bleikt og blátt og önnur tímarit í símsölu. Konan sat á kvöldin við símann og vélaði landsmenn til að gerast áskrifendur. Þessi gamanbragur sem Konni samdi og flutti á þorrablóti Vallamanna dró þann dilk á eftir sér að konan, í krafti stöðu sinnar sem símsölukona, hefndi sín fyrir braginn og gerði Konna að áskrifanda að Bleiku og bláu að honum forspurðum.
Skömmu eftir blót fór tímaritið Bleikt og blátt að berast til Konna í stöflum því hann fékk nefnilega nokkra árganga í kaupbæti ... og ekki nóg með það heldur fékk hann svo með fyrsta eintakinu tæki sem var allt í senn skrúfjárn, upptakari og töng.
Þó Bleikt og blátt hafi í upphafi átt að vera kynfræðslublað til að þroska kynlíf landans og að mestu skrifað af saklausum kynhjúkrunarfræðingum þróaðist það nú þannig að dónaskapurinn varð fræðslunni yfirsterkari svo Konni sá sig knúinn til að koma sér út úr þessu klandri með því að segja blaðinu upp, sem hann og gerði.
Það eina sem er eftir af þessum hrekk símsölukonunnar er fjölnota tækið sem hann fékk með fyrsta tölublaðinu.
Nú ætla allir helstu dónar heims að flykkjast til Íslands á næstunni. Konni ráðleggur öllum að forðast í lengstu lög að semja um þá gamanbragi og verða alls ekki á vegi þeirra. Þeir gætu nefnilega flækt þig í einhvern af sínum útsmognu dónavefjum án þess að þú hafir hugmynd um. Það er ekki einu sinni víst að það fylgi töng/skrúfjárn/upptakari með í kaupbæti sem mætti þá nota til að losa sig úr ósómanum.
Verður annars búandi í höfuðborginn á næstunni þegar heimsins svæsnasti dónaskapur og sori bætist ofaná allt svifrykið?
Kveðja,
Konni

Menningarkona við töskufæriband

2007-02-13T19:52:00.000Z

Um daginn var ég staddur á Reykjavíkurflugvelli nýlentur frá Egilsstöðum og beið við færibandið eftir töskunni minni. Við hlið mér stendur kona sem var líka að koma frá Egilsstöðum. Hún heilsar þar annarri konu og segir stundarhátt að mikið finnist henni nú gott að vera komin aftur í menninguna.
Eitthvað hefur dvölin á Austurlandi farið illa í konuna eða kannski er hún bara einlæg menningaráhugakona með ástríðu fyrir í fögrum listum.
Við þessi orð konunnar þarna við færibandið fór Konni að velta því fyrir sér hvort konan hefði bara ekki rétt fyrir sér. Er Reykjavík ekki sá staður á Íslandi þar sem menningin er mest og best?
Er ekki staðreynd að það er meiri menning í Reykjavík en á Austurlandi? Er ekki líka meiri menning á Egilsstöðum en Borgarfirði eystri. Er þá ekki enn meiri menning í Kaupmannahöfn en í Reykjavík og enn meiri menning í New York en í Köben?
Hvar skyldi svo hápunktur menningar heimsins vera? Hvert ætti menningarkonan við færibandið á Reykjavíkurflugvelli að beina sjónum sínum þegar höfuðborgin fær ekki lengur fullnægt hennar menningarlegu fýsnum?
Var þessi kona kannski menningarfíkill?
Gaman væri að vita hvar hún skyldi vera núna? Á listasöfnum borgarinnar? Að sökkva sér niður í Hómer og Sókrates á Borgarbókasafninu? Í miðri níundu sinfóníu Beethovens? Á óperu Stravinskys í íslensku óperunni. Í nýlistinni hjá þeim í Klink og Bank? Í heimsókn á Gljúfrasteini eða á spjalli í Reykjavíkurakademíunni ... eða ... er hún kannski einmitt núna í Bónus að kaupa snakk og popp og dæetkók fyrir júróvisijónteitið á laugardaginn?
Kveðja,Konni

Konni yrkir minningarljóð

2007-02-12T22:12:00.000Z

Vegna fjölda áskoranna birti ég hér með ljóð það er ég flutti á Vallablótinu í minningu þess að í ár eru átján ár síðan við Eymundur Magnússon bóndi í Vallanesi og nuddari, upplesari og leikari stigum fyrst saman á svið Iðavalla. Síðan þá hef ég flutt ýmsa bragi um bónda þennan og hefur yrkisefnið verið sótt í búskaparhætti í Vallanesi jafnt sem kvennamál.

Einu sinni var ort:
Í Vallanesi var hér áður voða mikið fjör
Þar voru kýr og hænugrey
og ein og ein jarðarför....

Þess verður að geta að hugtakið hýr sem kemur fyrir í ljóðinu er eingöngu notað til að ríma á móti hugtakinu kýr. Hugtakið hýr verður að skilja í þessu samhengi sem glaðvær persóna en alls ekki samkynhneigð.

Minningarljóð

Ó, minn kæri Eymi
aldrei þér ég gleymi
á Iðavöllum forðum,
er fólk sat undir borðum,
við fórum fyrst á svið.

Þú í grænum jakka
og ég í svörtum frakka
hjörtu allra unnum,
það ennþá báðir kunnum
að kæta kvenfólkið.

Nú göngum við á gleðifund
og gott er nú að vera hýr.
Í Vallanesi engar kýr
nú spígspora um grund.
En lerkilundur grænkar brátt
í skauti þínu sig hefur hátt
Héraðsskógur hlýr.

Ég vona að allir ljóðaunnendur sérstaklega í hópi Vallamanna muni hafa lúmskt gaman af kvæðinu. Síðan á ég þá ósk að við Eymundur í Vallanesi munum eiga önnur góð átján ár saman á þorrablóti Vallamanna.
Kveðja,
Konni

Konni er orðinn samfélagslegt afl!

2007-02-07T12:43:00.000Z

Konni er yfir sig glaður þessa stundina því svo virðist vera að áhrif pistla hans nái jafnvel inn á hið háa Alþingi.
Fyrir nokkru spurði Konni hver væri afstaða formanns Samfylkingarinnar til stóriðjumála í Hafnarfirði. Konni bjóst ekki við því, er þessi spurning var borin fram, að henni yrði svarað úr ræðustól Alþingis. Það er greinilegt að formaðurinn les Konna.
Konni hefur greinilega áhrif á gang mála í landinu.
Auðvitað hefði verið skemmtilegara hefði formaðurinn svarað spurningunni hér á síðunni, hún gerir það bara næst. Konni þakkar hér með formanni Samfylkingarinnar fyrir að gefa sér tíma til að svara Konna úr ræðustól Alþingis.
Og það sem meira er, svarið var gott.
Kveðja til Ingibjargar Sólrúnar,
Konni

Jökuldælsk daðurfræði

2007-02-05T22:12:00.000Z

Konni fór á þorrablót og skemmti sér vel. Það kom að því að Konni fór að lýjast svona upp úr klukkan þrjú um nóttina enda búinn að vera vakandi frá því hálf sjö um morguninn, fljúga yfir landið þvert og endilangt, vísitera Hallormsstað og Egilsstaði og stjórna söng fyrir glaða Vallamenn.
Er líða tók á blótið settist Konni sem sagt niður í arinstofu Iðavalla, dasaður með krosslagðar hendur, teygði úr sér og geispaði. Spratt þar þá upp Jökuldælingur einn sem sagðist ekki geta horft upp á Konna. Jökuldælingurin benti honum á að hann sæti milli fagurra meyja. Eftir því hafði Konni nefnilega ekki tekið. Jökuldælingurinn átti ekki orð yfir hversu lélegur Konni væri til kvenna. Karl milli tveggja fagurra blómarósa á ekki að sitja með krosslagðar hendur og geispa. Við þannig aðstæður á karl sem einhver töggur er í að efna til heiðarlegs daðurs og nota hendurnar til einhvers sem vit er í. Konni náði nú áttum eftir orrahríð Jökuldælingsins, tjáði honum að þetta væru giftar konur og minnti hann á 10. boðorðið. Sagði Jökuldælingurinn að þetta tíunda boðorð hefði aldrei aftrað Jökuldælingum frá því að nálgast konur og það stæði alls ekki í vegi fyrir daðri ef það væri framkvæmt af fagmennsku. Daður er nefnilega ekki það sama og daður sagði hann.
Nú þarf Konni nokkurn tíma til að nema jökuldælsk daðurfræði þannig að aldrei aftur geispi hann með krosslagðar hendur milli föngulegra meyja á þorrablótum.
Kv.
Konni

Hvers eiga harmónikkuleikarar að gjalda?

2007-02-01T11:05:00.000Z

Kátt var á hjalla við veitingu tónlistarverðlaunanna í gærkvöldi. Ekki er hægt að segja annað en fulltrúar unglingatónlistarinnar hafi gengið frá borði með fangið fullt af verðlaunum. Það virðist því miður vera þannig þessi árin að bernskuæfingar unglinganna eru taldar hápunktur listrænna afreka okkar í tónlist. Þó voru þar undantekningar á sem betur fer því skipuleggjendur báru gæfu til að kjósa alvöru tónlistarmann, fiðluleikara, sem björtustu vonina og Skúli Sverrisson hlaut verðlaun fyrir frábæra plötu. Þetta fólk kemur ekki reglulega fram á Bylgjunni, X-97.7 eða FM- 105.5 og hinum unglingastöðvunum svo almenningur kemst aldrei í tæri við þeirra tónlist og fer á mis við mikið. Ólafur Gaukur hefur líka verið minn maður frá því í gamla daga svo hann var vel að sínum heiðursverðlaunum kominn.
Þegar tilnefnt er til íslensku bókmentaverðlaunanna er ekki grautað saman unglingasprikli og alvöru bókmenntum. Þegar vín er vegið og metið er Bláa nunnan skilin eftir heima þó svo okkur unglingunum hafi þótt það ódýrt og svalandi hér í dentíð. Þegar kemur að tónlist er öllu hrært saman. Allt þykir jafngilt. Myndum við til dæmis setja Halldór Laxness og Andrés Önd saman í flokk klassískra bókmennta?
En varðandi þessi tónlistarverðlaun ætla ég að stinga upp á nokkrum flokkum til viðbótar. Í fyrsta lagi besti kirkjukórinn. Í öðru lagi besti blandaði kórinn utan Reykjavíkur. Í þriðja lagi besti Húnvetningakórinn. Í fjórða lagi besti kórinn sem tengist íþróttafélagi. Í fimmta lagi besti gítarleikarinn í hópi leikskólakennara. Í sjötta lagi besti tónmenntakennarinn. Í áttunda lagi besti útfararkórinn. Í níunda lagi besti besti blokkflautuhópurinn og í tíunda lagi besti harmónikkuleikarinn af landsbyggðinni ... því hvers eiga harmónikkuleikarar að gjalda?
Þá fyrst myndi nú færast fjör í leikinn.
Kveðja,Konni

Látum sérfræðingana ráða

2007-01-29T07:42:00.000Z

Ég sá í fjölmiðlum að nú sé einmitt verið að velja stúlkur til að taka þátt í fegurðarsamkeppnum um allt land. Það hlýtur að vera vandasamt. Þeir sem að þessu standa hljóta að hafa gríðarlega mikið vit á fegurð og óbrigðulan smekk. Í keppnunum sjálfum eru það svo dómnefndir skipaðar sérfræðingum sem velja fegurstu konur Íslands. Að mati Konna er þetta einmitt dæmigert fyrir hvernig standa á að keppnum af ýmsu tagi. Látum sérfræðingana velja ... alls ekki almenning. Afrakstur vals þessara fegurðarsérfræðinga er líka óumdeilanlega mjög góður. Við höfum átt fjórar alheimsfegurðardrottningar.
Ef almenningur hefði valið ættum við ekki eina einustu alheimsfegurðardrottningu því almenningur velur auðvitað bara frænku sína eða sveitunga en kastar lögmálum fegurðar út í hafsauga, klíkuskapur er okkar fag. Öll fjölskyldan er svo gerð út með gemmsana sína og tölvurnar til að kjósa frænkuna fram undir morgun og leitað allra leiða til að svindla samanber Magna-sumarið 2006.
Það verður ekki fyrr en sérfræðingar fara að velja Júórvísíónlagið að við eigum einhvern möguleika á vinningi, þó ekki væri annað en að komast inn í aðalkeppnina. Hættum að blanda almenningi í málið. Mér datt líka í hug hvort við ættum nokkuð að vera blanda almenningi í næstu kosningar. Getur þjóð sem ekki ber gæfu til að velja almennilegt júróvisíónlag valið sér góða stjórnendur?
Kveðja,
Konni

Sumir þora ... ekki ...alltaf

2007-01-27T16:14:00.000Z

Formaður Samfylkingarinnar segir að sá flokkur þori meðan aðrir þora ekki. Í sömu ræðu segir formaðurinn að flokkar eigi bara að hafa svona heildar stefnu í virkjanamálum en hins vegar eigi íbúar hvers svæðis að velja hvort þeir vilji álver eða virkjun eða bæði virkjun og álver. Pólitíkusar eru að gera sér grein fyrir því að umhverfismál eru heit mál nú á dögum, sumir reyndar með brunasár eftir framgöngu sína á Austurlandi. En flokkur sem þorir að taka á öllu meðan aðrir flokkar þora ekki, samkvæmt ræðu formannsins í dag og hefur auk þess nýlega gefið út umhverfisstefnu hlýtur líka að hafa skoðun á því hvort byggja eigi álver hér og þar og allsstaðar, annað er aumingjagangur. Reyndar sýnist mér þetta vera afstaða hjá stjórnmálamönnum í fleiri flokkum sem sýnir hvað þeir eru hræddir við að hafa skoðun á þessum málum. Með því að láta íbúa þessa lands kjósa hér og þar um hitt og þetta eru stjórnmálamenn að koma sér hjá því að hafa skoðun. Það má vel efna til atkvæðagreiðslna um hin ýmsu málefni utan hefðbundinna kosninga en við eigum heimtingu á að fá fram skoðanir stjórnmálaflokka og einstakra stjórnmálamanna, annars eru þeir ónytjungar. Vill formaður Samfylkingarinnar stækka álverið í Hafnarfirði eða ekki? Eða þorir hann kannski ekki .. alltaf?
Kv
Konni

Tólf tímar á tali

2007-01-24T07:48:00.000Z

Enn sækir Konni yrkisefni í ríka fólkið í fjölmiðlunum. Um helgina var heil síða í Fréttablaðinu helguð stjórnarformanni West Ham. Ljósmyndari fylgdist með honum í tólf tíma einn daginn og tók myndir sem síðan voru birtar í blaðinu. Á einni þessara mynda var stjórnarformaðurinn að tala í tvo farsíma í einu og myndatexti greindi frá því að þannig hefði það nú gengið þessa tólf tíma sem ljósmyndarinn fylgdist með formanninum. Það hlýtur að vera kúnst að tala í tvo farsíma í einu í tólf tíma samfleytt. Þannig er sennilega líf fjárfesta daginn út og daginn inn, mánuð eftir mánuð og ár eftir ár því starf þeirra krefst þess að vera í góðu sambandi ... annars geta þeir átt það á hættu að tapa öllu ... menn verða nefnilega að eiga fyrir Michael Jackson á næsta stórafmæli.
Hvernig liti heimurinn út í dag ef Maó formaður hefði átt tvo farsíma eins og stjórnarformaður West Ham og talað í þá báða tólf tíma á dag? Mér datt þetta í hug þegar ég horfði á heimildarmyndina um Maó formann. Hann átti ekki einn einasta farsíma en stjórnaði samt með harðri hendi heilu heimsveldi. Honum tókst meir að segja að fá 800 milljónir manna til að klæðast nákvæmlega eins búningum sem er mikið afrek miðað við formanninn, manninn með símana tvo, sem aldrei nær nema ellefu strákum í eins búning og það bara í 90 mínútur í senn.
Kv.
Konni

Forstöðumenn ættu ekki að eiga upptökutæki

2007-01-19T22:15:00.000Z

Konni lenti í ægilegri klemmu í dag, lengi vel vissi hann ekki í hvorn fótinn hann átti að stíga.
En eins og alþjóð veit mun fyrrverandi forstöðumaður trúarheilbrigðisstofnunar austur í sveitum hafa stundað leiki sem ekki eru kenndir á leikjanámskeiðum Æskulýðs- og tómstundaráða víða um land.
Forstöðumaðurinn mun hafa tekið þessa leiki upp á myndband og er svo sem ekkert óeðlilegt við það því fólki finnst yfirleitt gaman að varðveita minningar frá ýmsu sprelli í faðmi góðra vina.
Myndbönd verða nefnilega frábær heimild seinna meir um liðna tíð sem gaman verður að orna sér við í ellinni og sýna barnabörnunum.
Eitt þessara fjölskyldu-kynningarmyndbanda forstöðumannsins hefur nú ratað á netið og klemma Konna var sú að honum bauðst að skoða það í dag. Konna finnst yfirleitt ekkert gaman að horfa á fjölskyldumyndir frá fólki sem hann þekkir ekki neitt, en þetta myndband kitlaði svolítið.
Átti Konni að horfa á myndbandið eða átti Konni ekki að horfa? Þetta var meiriháttar klemma því honum var sagt að forstöðumaðurinn hefði kannski ekki átta að ýta á record-takkann við þessar kringumstæður því hann mun einmitt hafa verið að hlaupa svolítið í skarðið... eða var það fram fram fylking?
Eftir langa umhugsun, því Konna langaði í aðra röndina að skoða forstöðumanninn í leikjum sínum, ákvað Konni að leiðast ekki í freistni.
Mikið er Konni glaður núna að vera laus við að eiga einhversstaðar í skúmaskotum hugans, minningar um forstöðumann í fullorðinsleik.
Kv.
Konni

Playboy-kóngur fjölgar sér með rótarskotum

2007-01-17T20:53:00.000Z

Nýir möguleikar opnast við að flytja til LA, boðið að sitja fyrir í Plaboy. Þessa fyrirsögn sá ég í einhverju blaði um daginn. En þannig er að hin margumtöluðu Beckham-hjón eru að flytja til ELL-EI. Er það fréttist tók herra Heffner Playboy-kóngur mikinn fjörkipp og falaðist eftir frú Beckham á síður tímarits síns. Kallinn er ekki dauður úr öllum æðum þó mér sýnist nú þetta boð Heffners vera ótvírætt brot á tíunda boðorðinu um að engin skuli girnast konu náunga síns en það er nú önnur saga. Eðlilega sá frú Beckham í gegnum karlinn og afþakkaði "gott" boð þó hann borgar nú vel, það má hann eiga.
Hvort þessir möguleikar standi öllum til boða við flutning til LA er ósennilegt en mér finnst Byggðastofnun mætti læra af þessu. Af hverju býður hún ekki því fólki sem vill flytja út á land upp á eitthvað krassandi til dæmis eins og umfjöllun í Séð og heyrt eða Hér og nú.
En angar Playboy-veldsins teygja sig alla leið til Íslands. Hugh Heffner fjölgar sér greinilega með rótarskotum eins og öspin því nú eru að skjóta upp kollinum hér á Íslandi skilgetin afkvæmi hans. Já, sannkölluð rótarskot. Nú er verið (samkvæmt Blaðinu í dag) að skipuleggja risastórt Playboy-partí á veitingastaðnum Nasa við Austurvöll.
Samkvæmt Heffners-syni, skipuleggjanda kvöldsins, er lögð áhersla á að það verði sexý. Bara kynæsandi undirfatasýning og blautbolskeppni en ekkert klúrt þannig séð, svo vitnað sé orðrétt í fréttina.
Er öll vitleysan eins?
Ég var ekki hissa á því að talskona femínista væri ekki hrifin.
Heffners-son býst við um 1000 manns á herlegheitin. Svo er bara að vona að gestir verði ekki mjög kynæstir og yfirspenntir og geri ekkert sem Hugh Heffner hefði ekki gert eða þykir ekki boðlegt á íslensku þorrablóti. Reyndar heyrði ég í fréttum í gær að í Bolungarvík sé fráskildum meinuð þátttaka í þorrablóti, einungis pör fá aðgang. Ég var yfir mig hneykslaður í fyrstu en sé núna að þetta er af siðferðisástæðum, runnið undan rótum 10. boðorðsins og því fullkomlega réttlætanlegt. Skyldi siðferðisstaðall þorrablótsefndar Egilsstaða vera á þessu rosa-plani?
Kveðja,
Konni

Það er galdur að gera mikið úr litlu

2007-01-14T10:58:00.000Z

Íslenska þjóðin er skrýtin eða kannski bara nýtin því hún getur gert mjög mikið úr mjög litlu. Við getum meir að segja látið líta út fyrir að þetta örsamfélag sé mun fjölmennara en það er í raun og veru. Í fyrrasumar unnum við til dæmis það afrek að tryggja Magna eitt af efstu sætunum í amerískum sjónvarpsþætti. Magni keppti við fulltrúa þjóða sem telja milljónir. En Magni sigraði því við Íslendingar getum gert mikið úr litlu. Tugþúsundir atkvæða komu frá nokkur þúsund kjósendum. Heilu fjölskyldurnar svindluðu og svindluðu kvöld eftir kvöld í þágu góðs málstaðar.
Á forsíðu Fréttablaðsins í dag er mynd af fólki á rýmingarsölu IKEA. Þar segir í myndatexta að 6000 manns hafi bitist um útlitsgölluð húsgögn og hluti sem höfðu verið til útstillingar. Síðan þessi verslun hóf starfsemi sína um miðjan október hefur yfir hálf milljón gesta litið þar við. Hálf milljón! Hver einasti rólfær Íslendingur hefur komið tvisvar í heimsókn til IKEA. Konni hefur ekki notið gestrisni IKEA svo einhver hefur þurft að heimsækja verslunina oftar en tvisvar til að fylla skarð Konna. Er þetta ekki flott? Er alveg öruggt að við séum bara 300 þúsund? Var ekki Hagstofan ekki einmitt með starfsmannateiti síðast þegar það var talið?
Ég legg til að næsta manntal verði gert eftir teljurunum í IKEA, Kringlunni og Smáralind, þá kemur hið sanna í ljós. Ekki telja eftir teljurunum í Listasafni Íslands, Kjarvalsstöðum eða aðsókn að Myrkum músíkdögum.
Kveðja,
Konni

Tískan verður að eiga greiða leið um allt land

2007-01-13T12:16:00.000Z

Og ég sem hélt að á landsbyggðinni byggju bara hagyrðingar og harmónikkuleikarar í kraftgöllum. Nú hefur annað komið í ljós því í Fréttablaðinu í dag er eftirfarndi yfirlýsing: Húsvíkingar eru vel meðvitaðir um það sem er í gangi, hvort sem það snýst um hár eða tísku. (bls. 6 í allt-tíska og fleira)
Landsbyggðarfólk er sem sagt með á nótunum. Þetta eflir mjög traust mitt á landsbyggðinni. Samt sem áður fullyrði ég það að tískan berst fyrst til Reykjavíkur. Þeirri staðreynd verður ekki haggað. Þegar hún hefur sannað sig þar og fest rætur, berst hún um þjóðvegi landsins og tekur fyrst að grassera í Hvergerði og Borgarnesi. Síðan berst tískan norður og suður um landið og á endanum mætast tískustraumarnir að norðan og sunnan á Egilsstöðum. Það er ástæðan fyrir þessari miklu gerjun sem er á Austurlandi. Á Egilsstöðum safnast tískan síðan upp því þaðan getur hún ekkert farið. Tískan fer nefnilega aldrei til baka. Hún á reyndar eftir að renna sér á Borgarfjörð-eystri og niður á firði en þau byggðarlög eru bara yfirfall fyrir tískubylgjurnar sem skella á Egilsstöðum.
En athugið það að þegar bylgjan skellur á Egilsstöðum er komin ný í Reykjavík og þar með eru Héraðsmenn alltaf pínulítið á eftir okkur hinum. Húsvíkingar rétt sleppa fyrir horn (hvort sem um er að ræða hár eða tísku) samkvæmt Fréttablaðinu í dag. Það er sennilega vegna þess að þeir eru örlítið nær Reykjavík.
Þetta sýnir hvað bættar samgöngur eru mikilvægar fyrir Fljótsdalshérað og Austurland allt. Kannski var það einmitt tískan sem formaður Samfylkingarinnar var að hugsa um þegar hún sagði að háhraðatenging alls landsins væri eitt mikilvægasta verkefni framtíðarinnar ... hver vill vera púkó?
Kv.
Konni

Maðurinn sem sá tvær halastjörnur

2007-01-11T19:23:00.000Z

Jæja, nú hljóp á snærið hjá Konna. Konni sá halastjörnuna, hina einu og sönnu og það með eigin augum ofan af Öskjuhlíð í morgun. Nú hefur Konni séð hvorki meira né minna en tvær halastjörnur. Þessa og svo Halleys-stjörnuna fyrir nokkrum árum. Konni stendur í þeirri trú að mjög fáir hafi sé svo margar halastjörnur með eigin augum og þess vegna er Konni sperrtur þessa stundina.
Þá vaknar spurningin, eru ekki þeir sem hafa séð meira en annað fólk á einhvern hátt merkilegra og lífsreyndari mannskepnur? Er sá sem hefur séð tvær halastjörnur ekki helming merkilegri en sá sem hefur bara séð eina? Hann hlýtur þá líka að vera tvisvar sinnum merkilegri en sá sem ekki hefur séð eina einustu halastjörnu.
Konni þekkir fólk sem hefur séð svo miklu meira en hann. Þetta er langförult fólk sem hefur ferðast til fáfarinna staða innanlands og utan og séð ýmislegt með eigin augum sem Konni hefur varla séð á mynd.
Konni finnur alltaf til vanmáttar gagnvart slíku fólki.
Konni hefur bara komið til örfárra landa, Danmerkur og Legolands og svo smávegis til Noregs.
Núna hefur Konni séð tvær halastjörnur. Í miningagreinum um Konna verður tekið fram að hann hafi einmitt verið einn þeirra fáu sem sáu með eigin augum ... TVÆR halastjörnur og það bara í einu lífi.
Geri aðrir betur.
Kveðja,
Konni

Tröppur, skemmtilegt innlegg í trúarlífið

2007-01-08T19:10:00.000Z

Ég var að bíða eftir sjónvarpsfréttunum áðan og smellti mér rétt sem snöggvast á Ómega. Lítið fór fyrir prédikun þá stundina því hin trúarlega verslun Skjákaup var í fullum gangi. Það er alveg merkilegt hvað hversdagslegir hlutir fá nýja merkingu bara við það að vera til sölu í Skjákaupum.
Nú voru þeir að selja stiga eða tröppur. Við fyrstu sýn voru þetta venjulegar tröppur til notkunar í heimahúsum.
En hvað kemur í ljós þegar betur er að gáð?
Þessi tröppusala er kænskubragð þeirra Ómegamanna, hluti trúboðsins?
Heimiliströppur er hjálpartæki trúarlífsins?
Stigi eða trappa eru þegar öllu er á botninn hvolft gríðarlega merkilegt trúartæki.
Stigi er tákrænt tæki því með hjálp stiga kemst maður nær almættinu. Hærra minn guð til þín, segir í sálminum. Led Zeppelin sungu um Stairway to heaven og prestar stíga upp í prédikunarstólinn og svífa yfir höfðum kirkjugesta.
Þeir hjá Ómega eru snillingar að sýna okkur fram á að nánast allt sem við gerum hefur trúarlega merkingu og tilgang. Jafnvel að klifra upp í skáp er skemmtilegt innlegg í trúarlífið.
Já, enginn verður svikinn af innliti á Ómega.
Gefum öll hjálpartækjum trúarlífsins meiri gaum.
Svo voru þeir farnir að selja naglalakk en þá skipti ég yfir á fréttirnar. Vonandi verður það endursýnt.
Kveðja,Konni

Konni og Þórður vinur hans

2007-01-03T12:41:00.000Z

Það bendir margt til þess að Konni sé illa innrættur. Konni hefur af því nokkrar áhyggjur. Þetta vonda innræti á sér ýmsar birtingarmyndir. Ein þeirra er sú að Konni getur ekki varist talsverðri gleði þegar enska kanttspyrnuliðið West Ham tapar. Þessi tegund gleði er stundum kölluð Þórðargleði. Það er ekki það að Konni hafi haft horn í síðu þessa félags í gegnum tíðina. Þessar kenndir komu fyrst fram eftir að tveir íslenskir kaupsýslumenn keyptu félagið fyrir marga marga milljarða.
Af hverju getur Konni ekki staðið með þessum tveimur löndum sínum og haldið með West Ham? Þetta eru duglegir menn. Þeir hafa orðið ríkir fyrir eigin tilverknað. Ekki hafa þeir tekið neitt frá Konna. Ekki á Konni neitt sökótt við þá.
Samt sem áður stekkur Konni hæð sína er West Ham tapar.
Konni hefur reynt að komast til bonts í þessu vegna þessa að Þórðargleðin er byggð á öfund og vondu innræti og vont innræti veikir sennilega ónæmiskerfið, styttir lífið og er örugglega synd þar að auki.

Mikið óskaplega hlakkaði í Konna er West Ham tapaði sex núll núna um daginn.
Kannski er þetta samneyti Konna við Þórð vin sinn komið til af því að Konni er pirraður á auðmönnum sem spreða peningum í heimskuleg verkefni. Kaupin á West Ham var heimskulegt verkefni. Það kostaði þessa gæja tíu milljarða, í það minnsta, að kaupa sér aðgang að heldrimannaklúbbum í London. Síðan ætluðu þeir með sínum íslensku töfrafingrum að breyta vatni í vín og gera West Ham að svokölluðu Meistaradeildarliði á nokkrum árum. Það er hlaupin einhver oftrú í kollinn á sumum íslenskum fjármálaspekúlöntum.
Kæru vinir, ef illa fer, hver borgar þá brúsann?
VIÐ!
Þrátt fyrir það að vitleysan lendi á mér sem viðskiptavini Landsbankans, ætlum við Þórður að fagna vel og innilega við hvert tap West Ham.
Já, Konni er illa innrættur.
Kveðja,
Konni

"... og aldrei það kemur til baka"

2006-12-31T00:18:00.000Z

Konni getur andað léttar því enn eitt ár hefur gengið áfallalaust fyrir sig. Eiginlega þakkar Konni fyrir hvern áfallalausan dag því áföllin geta dunið yfir fyrirvaralaust. Maður þarf ekki annað en að renna á hinum mörgu hálu svellum lífsins til að allt fari úr skorðum.
Þá er bara að draga andann djúpt og stinga sér inn í næsta ár.
Völvur keppast þessa dagana við að greina okkur frá því sem árið 2007 muni bera í skauti sér. Samkvæmt völvu Vikunnar á sumarið ekki að verða neitt sérstakt nema þá helst á Austurlandi. Þetta hefði nú Konni getað sagt ykkur. Völvan segir að það verði stjórnarskipti í vor. Það hefði nú Konni getað sagt ykkur líka. Konni hefði líka getað sagt ykkur að á árinu verði veisluhöld á Bessastöðum og einhver átök verði í kringum Davíð Oddsson og Ingibjörgu Sólrúnu.
Við erum öll meir eða minna skyggn á framtíðina ... að minnsta kosti á það fyrirsjáanlega. Guð einn veit allt hitt þó sem betur fer sé hann tregur til að troða upp með það á síðum Vikunnar. Ekki vil ég vita hvað næsta ár ber í skauti sér. Leyfum því bara að koma og tökum því sem að höndum ber.
Gleðilegt ár kæru vinir!
Konni

Fara gáfur eftir höfuðlagi?

2006-12-30T00:57:00.000Z

Konni fór í leikhús í vikunni. Fyrir framan hann sátu þrír karlmenn, allir sköllóttir. Þar sem Konni var kominn tímanlega í salinn og svo sem lítið við að vera nema virða fyrir sér leikhúsgesti var Konni áður en hann vissi af kominn í djúpar pælingar um höfuðlag þessara manna. Höfuðlag þeirra var á margan hátt afar myndrænt og skoðunar virði. Konni hafði til dæmis ekki áður áttað sig á hvernig eyrun eru eins og vaxin út úr höfuðleðrinu. Eyru okkar eru mjög kynleg en falleg sköpun. En aftur að höfuðlaginu.
Einn þessara manna var með frekar kúlulaga höfuðkúpu meðan hinir tveir voru með ílanga. Sá með kúluhausinn er þekktur maður einkum og sérílagi fyrir gáfur. Konna fannst höfuðlag þessa manns bera með sér að hann hafi nóg pláss fyrir heilann. Ekkert ætti að þrengja að. Heilinn hans hefur nóg pláss. Heilar hinna mannanna hljóta að vera ílangir eins og höfuðlagið því heilinn hlýtur að fylla út í allt það rými sem hann er skapaður í. Allavega dinglar heilinn aldrei laus og aldrei hefur Konni heldur heyrt af því að heilinn sprengi af sér höfuðkúpuna.
Svona án þess að þekkja hina tvo gat Konni ekki varist þeirri hugsun að heilar þeirra hefðu ekki sama svigrúm og heili þess með kúluhausinn ... og þá vaknaði spurning sem gaman væri að fá svar við. Skyldu gáfur fara eftir höfuðlagi? Hugsanlega þrýstir þröng höfuðkúpa á einhverjar stöðvar eða kemur í veg fyrir að þær þroskist almennilega á meðan rúm höfuðkúpa leyfir heilanum að þroskast á fullkominn hátt.
Er mikið rými höfuðkúpunnar forsenda fyrir miklar gáfur?
Kæru vinir, lítið í kringum ykkur og kannið þetta nú fyrir mig.
Kveðja,
Konni

Karlmenn, gangið ekki í björg í Kringlunni!

2006-12-24T09:09:00.000Z

Það ber margt fyrir augu í jólaösinni. Konni var í Kringlunni í gær, að sligast undan fjórum þungum Bónuspokum. Stefnan var að koma þessum pokum sem fyrst í bílinn og flýta sér heim þegar áform Konna breyttust snarlega. Konna varð nefnilega litið inn í eina tískuverslunina, rándýra verlsun. Þar bar fyrir augu sýn sem varð til þess að að ósjálfrátt, já ósjálfrátt breytti Konni um stefnu með pokana og var áður en hann vissi af kominn inn í verslunina. Konni sá nefnilega gyðju eða dís. Gyðjan var fegurðardís frá toppi til táar og klæðnaðurinn ýtti undir allt sem hægt var að ýta undir. Konni var sem í leiðslu, alveg heillaður. Konni hélt þó stillingu sinni og prúðmennsku. Að lokum mannaði Konni sig upp og gaf sig á tal við gyðjuna. Hjarta Konna sló hratt því það er ekki á hverjum degi sem Konni kemst í tæri við dísir. Það hefði hann samt ekki átt að gera. Það er nefnilega ekki nóg fyrir gyðjur að hafa allt til alls til að dáleiða karla á löngu færi og soga þá að sér eins og segull járn ef málrómurinn er ekki líka í samræmi við útlitið. Í stað seiðandi álfkonumálróms í stíl við allt hitt var málrómur gyðjunnar eins og hver annar stelpumálrómur.
Mikil urðu vonbrigði Konna og hugsaði að hann þá með sér að betri væri venjuleg kona með fallegan málróm heldur en gella með gjallanda.
Konni kom Bónuspokunum heilu og höldnu heim.

Sögur herma að í gamla daga hafi álfkonur tælt margan prúðan piltinn til sín og ef þeir komust til aftur til mannheima voru þeir sturlaðir eða viti sínu fjær. Lítið fer fyrir slíkum sögum nú á dögum. Var þetta álfkona sem Konni sá í Kringlunni? Allavega var gyðjan ekki við afgreiðslu seinna um daginn er Konni ætlaði að kanna málið. Best að Konni kanni þetta aftur í dag.
Karlmenn, gangið ekki í björg í Kringlunni!
Gleðileg jól!
Konni

Lækningamáttur íslenskra karla

2006-12-20T14:42:00.000Z

Meðferðarstofnun ein hefur verið svolítið í sviðsljósinu upp á síðkastið. Konni ætlar ekki að blanda sér í þá umræðu. Konni fékk hins vegar hugmynd.
Forstöðumaður stofnunarinnar segist gefa frá sér líkamsvessa sem hafi lækningamátt. Þetta er stórkostlegt og gefur tilefni til að kanna lækningamátt líkamsvessa hjá fleiri íslenskum körlum. Einu sinni var flutt út blóð úr fylfullum merum. Úr blóðinu er hægt að vinna efni í lyf. Hvers vegna ekki að kanna í alvöru lækningamátt líkamsvessa íslenskra karla? Kannski vessar fleiri karlmanna en forstöðumannsins hafi lækningamátt. Þarna er hugsanlega vannýtt auðlind. Húsvíkingar ættu að kanna þetta. Ef til vill gætu læknandi vessar íslenskra karla orðið meiriháttar iðnaður og komið í staðinn fyrir álver. Þetta yrði örugglega ekki orkufrekur iðnaður.
Kveðja,
Konni

Öll örvun er leikur að eldi

2006-12-18T18:59:00.000Z

Alltaf heyrir maður eitthvað nýtt. Konni var fyrir nokkru að segja ykkur frá því að hann ætti Shakespere komplett ónotaðan/ólesinn upp í hillu. Veldur þetta ritsafn honum nokkru hugarangri því í hvert sinn hann lítur þessar bækur er eins og hann spegli sig í eigin andleysi og heimsku.
Kannski ætti hann að láta vaða og byrja á kallinum því Konni var einmitt að lesa á mbl.is að breskir vísindamen hefðu komist að því að ritstíll Shakesperes örvi heilann. Þetta eru stórtíðindi fyrir Konna. Fyrir fram nefið á honum er sem sagt tæki til heilaörvunar og það ónotað. Með lestri ritsafnsins slær hann tvær flugur í einu höggi, yfirvinnur Shakeperes-fælnina og fær í kaupbæti ný-örvaðan heila.
Konni hefur reyndar nokkrum sinnum reynt að ná taki á meistaranum en ekki alveg áttað sig á þræðinum. Eftir nokkrar blaðsíður þarf Konni að byrja á öllu upp á nýtt því söguþráður og persónur snarsnúast í heilanum á honum.
Heili Konna er greinilega ekki nógu örvaður ... þar vantar mikið á.
Það liggur því beinast við að hefja lesturinn strax í kvöld og þræla sér í gegnum ritsafnið sem fyrst.
En ...
Hvað hefur Konni með það að gera að örva heilann? Þetta er vafasöm tilraun. Hvaða áhrif mun ný-örvaður heili hafa á Konna? Mun Konni verða betri maður, standa í stað eða jafnvel verða verri maður. Getur verið að þeir sem hafi lesið allt ritsafn Shakesperes séu oförvaðir? Hefur persónuleiki þeirra breyst? Hafa þeir farið á einhvern yfirsnúning? Hafa þeir kannski dáið af oförvun?
Allar örvanir eru að mati Konna hættulegar. Getur verið að Shakespere virki á heilann eins og dónablöð virka á önnur líffæri? Úps!
Þetta verður að rannsaka. Allavega þorir Konni ekki að byrja á Shakespere fyrr en þessum spurningum hefur verið svarað.
Kveðja,
Konni

Undursamlegur hárblásari

2006-12-14T21:15:00.000Z

Var að horfa á Ómega. Ég var að vonast eftir innblæstri frá einhverjum innblásnum prédikara en mér til mikilla vonbrigða varð innblásturinn að sýnikennslu í hárblæstri því þarna var verðið að auglýsa hárblásara fyrir konur. Ómega-menn reka nefnilega líka sjónvarpsmarkað.
Hárgreiðslumeistarinn, sem hafði fundið upp nýja tegund af hárblásara, fór þarna fimum fingrum um hár nokkurra kvenna. Á lífi þessara kvenna hafði hvílt sá skuggi að þær voru allar með líflaust, slétt og óspennandi hár. Þær höfðu lengi þráð og óskað sér loftkennds krullaðs hárs en þrátt fyrir langa leit að rétta krullujárninu hafði þeim ekki orðið að ósk sinni. Þær voru því glaðar konurnar á Ómega sem höfðu fengið líflegt og loftkennt hár með þessu ævintýralega tæki. Svona geta hárblásarar skipt miklu máli.
Þessi auglýsing varð mér hins vegar meiri innblástur en ég átti vona á því hún sýndi svart á hvítu hvernig Guð vinnur. Hann kemur oft inn í líf okkar á óvæntan hátt og á ólíklegustu stöðum ... þarna sýndi hann þessum konum kærleika sinn gegnum fingur hárgreiðslumeistarans, mannsins sem fann upp hinn undursamlega hárblásara.
Kveðja,
Konni

Tímamót eru í nánd - Konni fékk hugmynd

2006-12-11T23:23:00.000Z

Er betra að vera góður í einu en skítsæmilegur í mörgu? Konni veltir þessu nú fyrir sér því lífið er stutt. Í hvað er þess virði að eyða lífinu? Þar sem Konni trúir einlægt á framhaldslíf verður allt sem maður gerir hérna megin að miðast við væntanlega framtíðarmöguleika hinum megin. Verst er að maður veit ekki nákvæmlega hvað býðst er yfir kemur. Ef svo væri gæti maður einbeitt sér að því í þessu lífi sem ekki býðst í hinu næsta.
Af hverju fær maður ekki miklu nákvæmari útlistanir á framhaldslífinu? Til hvers eru allir þessir spekúlantar og guðfræðingar? Við viljum auðvitað vita hvernig búið er þarna fyrir handan. Ég er nú búinn að horfa mikið á Ómega, þar hefur ekkert komið fram sem hönd er á festandi, bara einhverjar pælingar um tilvist með Guði. Það er helst að Þórhallur miðill geti frætt mann um þetta. Reyndar varar Ómega mjög við heimsóknum til miðla svo þá er sú leið ófær.
Núna í þessum skrifuðu orðum fékk Konni dásamlega og dýrmæta hugmynd. Verst hvað hún kemur seint fram.
Af hverju settum við ekki peningana sem fóru í Kárahnjúkavirkjun, álverið og allt það í að rannsaka framhaldslífið?
Komast yfir landamærin.
Þá hefðu Austfirðingar nóg að gera við að leiðbeina öllum heiminum um víðlendur himnaríkis. Þetta yrði ferðaþjónusta sem myndi mala gull svo lengi sem land byggðist. Þá gæti maður líka séð hvað borgar sig að gera hérna megin grafar og hvað má geyma þar til síðar.
Austfirðingar hefðu getað unnið að þessu sjálfir og ég er viss um að þeim hefði tekist þetta með svona svakalega mikla peninga milli handanna og alla þessa verkfræðinga og guðfræðinga og ýtukalla á svæðinu.
Verst hvað Konni fékk þessa hugmynd seint. Kannski gætu Húsvíkingar notað hana. Ég las nefnilega í Morgunblaðinu að í spádómum Nostradamusar sé gert ráð fyrir að Íslendingar gegni á komandi tímum veigamiklu hlutverki sem andlegir leiðtogar heimsins og við verðum lykilþjóð við að koma á réttlátum heimi.
Áfram Austurland - stundin er upp runnin!
Kveðja
Konni

Listin er löng en lífð er stutt

2006-12-10T10:09:00.000Z

Konni varð áþreifanlega var við í gær að honum endist greinilega ekki aldur til að komst til botns í hyldýpi listarinnar.
Konni stakk sér þó einu sinni út í hylinn. Konni keypti Íslendingasögurnar og ætlaði í skipulegt ferðalag um veröld þeirra sagna.
Hvar í ósköpunum skyldu þær bækur vera?
Einu sinni keypti Konni Shakespere komplett.
Sá bókaflokkur er ólesinn upp í hillu.
Einu sinni keypti Konni heildarútgáfu Þjóðsagna Jóns Árnasonar.
Nú eru þær að mestu ólesnar upp í hillu.
Konni fór einu sinni á námskeið í listasögu og hefur grautað í tónlistarsögunni en er samt einhvern veginn alltaf að svamla í yfirborðinu.
Konni hefur lítið lesið í Biblíunni.
Konni á líka eftir að hlusta á Niflungahringinn hans Wagners og lesa margar bækur eftir Laxnes svo ekki sé nú talað um mörg hundruð hillumetra af öðrum jöfrum bókmenntanna.

Allt þetta vitraðist Konna í gær þegar hann sá að út er komin ný matreiðslubók eftir Jóhönnu Vigdísi fréttakonu. Einu sinni hafði Konni nefnilega uppi mikil áform um að kafa djúpt í hina göfugu list matargerarðlist. Hér á heimilinu eru því til all nokkrar matreiðslubækur.
Hér sé ég Kökubók Hagkaupa, Veislubók Hagkaupa, Tertubók Hagkaupa, Eftirréttabók Hagkaupa. Matreiðslubók Nönnu sem Konni keypti af Rósu Ingólfs í gegnum síma og svo eru það margir árgangar af Gestgjafanum og norsku matreiðslubækurnar.
Þó Konni tæki sig nú til í og byrjaði á fyrstu uppskriftinni í Matreiðslubók Nönnu tæki síðan þá næstu og svo koll af kolli í gegnum allan Gestgjafann og norsku matreiðslubækurnar og Hagkaupsbækurnar og allt hitt, entist honum ekki öll ævin.
Er þetta ekki grátlegt?
Hvar fór Konni út af sporinu?
Listin er löng en lífið er svo hrikalega stutt ... sorgleg staðreynd?
Eru fleiri sem kannast við þetta vandamál?
Kveðja,
Konni

Bréf til tilfinningasamra Héraðsbúa

2006-12-08T08:59:00.000Z

Kæra Rannveig og aðrar tilfinningaverur
Ég segi það satt. Það er allt of mikil tilfinningasemi í þessum heimi. Við Íslendingar erum fram úr hófi viðkvæmir og tilfinningasamir. Hér í Reykjavík eru til dæmis átthagafélögin gott dæmi. Húnvetningar, Breiðfirðingar, Héraðsbúar, Sunnlendingar geta bara ekki skilið við. Átthagarnir eru okkur greinilega mjög mikll fjötur um fót. Við losnum aldrei frá æskunni. Þurfum sífellt að vera með annan fótinn í hinu liðna.
Nú er að rofa til. Ný kynslóð er að koma til vits og ára. Sprengmenntaðir tilfinningaleysingjar. Skýrast kemur þetta fram í fjármálheiminum. Þar reka menn fyrirtæki með það eitt að leiðarljósi að skila hámarksgróða. Það er gott. Menn skattlegja aldraða og rýja þá inn að skinni. Það er líka gott því við þurfum að eiga fyrir friðargæslunni, tvöfölduninni, og kaupinu mínu. Menn vilja leggja niður gamla Ríkisútvarpið mitt svo Bylgjan og aðrar gleðirásir verði þrjúhundruðsextíuogfimm sinnum sterkari. Það er örugglega líka gott því þá verða eigendurnir þrjúhundruðsextíuogfimm sinnum ríkari. Það er ekki mikil tilfinningasemi á þeim bæ. Þetta er allt gott.
En kæra Rannveig ef það verður gróði af þorrablóti brottfluttra Héraðsbúa þá finnst mér bara allt í lagi að halda það ... án allrar tilfinningasemi. Þar sem nú er búið að ráða mig sem söngstjóra á það blót er alveg pottþétt að sá söngur verður ekki tilfinningaþrunginn. Hann verður praktískur ... þ.e. stefnt að hámarksgleði.
Kv
Konni

Sleppum allri tilfinningasemi, hún er bara ávísun á vesen

2006-12-06T12:23:00.000Z

Konni var að hlusta á yfirlit hádegisfrétta. Í fréttum var það einna helst að ráðherra, ég held utanríkisráðherra, segir að baráttan gegn hvalveiðum byggist eingöngu á tilfinningarökum. Þetta er örugglega rétt og auðvitað alls ekki hægt ef fólk blandar tilfinningum í svona gríðarlegt hagsmunamál.
Tilfinningar eru að bera okkur ofurliði. Fullt af fólki er á móti hinu og þessu vegna þess að því finnst bara eitthvað vera fallegt eða gott. Þetta gengur bara ekki lengur.
Nú nálgast jólin. Margir eru farnir að hlakka til jólanna. Gæti verið að fólk hlakki til jólanna á tilfinningalegum forsendum? Það er hið versta mál. Konni hlakkar til jólanna vegna þess að þá fær hann smá frí. Þá fær Konni líka gott að borða og fullt af gjöfum. Þetta er praktísk jólatilhlökkun. Tilfinningar Konna koma þar hvergi nærri.
Tilfinningar koma allt of víða við sögu. Tökum til dæmis hugtökin ást og fegurð. Þessi hugtök eru alltaf tengd tilfinningum. Menn hafa ást á hinu og þessu og jafnvel fallegu landi. Þetta er ekki gott eins og sýndi sig í Kárahnjúkmálinu. Menn mega bara ekkert gera vegna tilfinninga fólks út í bæ.
Nei, farsælast væri ef við gætum útlokað eins mikið af tilfinningum og hægt er því þá gætum við loksins stjórnað þessum heimi alveg tilfinningalaust og drepið alla hvali þess vegna.
Utanríkisáðherra er á réttri leið.
Kveðja,
Konni

Göngum veg gleðinnar með fábrotinn smekk

2006-12-04T17:52:00.000Z

Mikið er Konni feginn að vera með frekar fábrotinn smekk. Hann hefur tekið eftir því að fólk með góðan smekk er eiginlega alltaf fúlt. Góður smekkur leiðir af sér svo gagnrýna hugsun að ekkert nema það besta þykir réttmæt ástæða fyrir smá gleði.
Þeir sem eru hins vegar með fábrotinn smekk gleðjast yfir litlu. Tökum nokkur dæmi.
Þeir sem eru með fábrotinn tónlistarsmekk gleðjast yfir öllu nema því sem er langt og þungt og sannarlega leiðinlegt. Þeir sem hafa fábrotinn bókmenntasmekk þurfa ekki hástemmd ljóð eða Íslendingasögurnar til að ylja sér við. Slíkt fólk gleðst yfir textum Lónlí Búbojs og Gylfa Ægissonar. Þeir sem hafa vondan myndlistarsmekk gleðjast yfir einföldum fallegum myndum og velmáluðum en þurfa ekki Feneyjarbínealinn til að stökkva hæð sína af gleði. Fólk með lélegan vínsmekk gleðst yfir ódýrum vínum. Þarf ekki að dýfa nefinu í vínið, sér engan tilgang í leikfimiskúnstum með glösin eða umhellingum og litbrigði vínsins skiptir það engu máli. Nei, þetta fólk nýtur þess að drekka ódýrt vín og gleðst. Fólk með lélegan smekk á bílum getur glaðst yfir ódýrustu gerð af Toyota eða notuðum Lada sport en þarf ekki BMW eða Bens til að koma sér milli staða. Þeir sem hafa lélegan smekk fyrir fólki geta látið sér líka vel við ljótt fólk en þurfa ekki Herra Ísland eða alheimsfegurðardrottningar til að gleðjast yfir.
Já, mikið er Konni þakklátur fyrir að hafa fábrotinn smekk. Þess vegna er Konni líka alltaf svo glaður ... þarf ekki að burðast með góðan smekk. Konni ráðleggur því fólki með dýran og góðan smekk að taka upp breytta siði og ganga gleðinnar veg með okkur hinum.
Kveðja,
Konni

Bókaverslunarpælingar

2006-12-02T18:32:00.000Z

Gaman, gaman ... nú streyma bækurnar úr prentvélunum. Mér finnst dálítið skemmtilegt að rangla inn í bókabúðir á þessum árstíma því þar svigna borðin undan bókastöflunum. Það er gaman að kanna þessa stafla.
Bókabúðir eru menningarstofnanir. Þar er rétta stemningin til að skoða bækur.
Ég á mjög erfitt með að kaupa bækur í Bónus og öðrum matvöruverslunum þó verð bóka þar sé oft mun lægra en í bókabúðunum, hvernig sem nú á því stendur. Ef til vil erum við að greiða niður bækurnar með matvöruverðinu. Ef til vill erum við að borga Bónus-bækurnar niður allt árið svona smátt og smátt. Það finnur enginn fyrir hundraðkalli hér og hundraðkalli þar. Kannski eru Bónuskallarnir bara svona góðir við okkur og alla hina. Sletta ódýrum bókum í okkur fyrir jólin og nokkrum milljónum í UNICEF og þá eru allir ánægðir. Að kaupa bók í Bónus er eiginlega hálfgert framhjáhald.
Sem betur fer virðast bókabúðir lifa sæmilegu lífi þrátt fyrir þessa samkeppni um jólin. Eða skiptir það kannski engu máli hvar maður kaupir hvað svo framarlega að maður fái það ódýrt? Væri samt ekki svolítið kynlegt að kaupa ódýran hamborgarahrygg í Máli og menningu?
Kveðja
Konni

Krummi krunkar á krummaskuðum og jafnvel í Reykjavík

2006-11-30T08:50:00.000Z

Valinkunnar konur hafa á bloggsíðum sínum fjallað um ansi skemmtilegt mál
sem kynnt var í Fréttablaðinu í vikunni. Þetta er úttekt á mestu
krummaskuðum á Íslandi. Reyndar er þetta hugtak krummaskuð mjög
skemmtilegt og myndrænt hugtak sem gaman væri að fá listamenn til að túlka
með ýmsu móti.
Í könnuninni fékk Reyðarfjörður aldeilis á baukinn, kosinn mesta
krummaskuð á Íslandi. Reyndar er ég þeirri skoðun ekki sammála þó
Reyðarfjörður hafi ekki fríkkað við að byggt var risa-knattspyrnuhús í
miðjum bænum.
Mín niðurstaða er sú, að í raun sé Reykjavík mesta krummaskuðið á landinu.
Reyndar stærsta krummaskuðið og að öllu leyti það öflugasta en krummaskuð
samt.
Þegar Konni flutti aftur til borgarinnar eftir að hafa verið upp í sveit í
næstum tvo áratugi kom það honum á óvart hversu höfuðborgin var í raun
krummaskuðaleg. Reyndar eru ákveðnar kreðsur sem halda að Reykjavík sé
hipp og kúl eins og rithöfundur einn orðaði það. En fyrir venjulegt fólk
er Reykjavík bara bær þar sem það starfar og sefur.
Bónus í Reykjavík er bara eins og venjuleg Bónusverslun úti á landi. Blokkaríbúðin í úthverfinu er bara eins og blokkaríbúð úti á landi. Þú leggst í sama sófann og glápir á sama sjónvarpsefni hvort sem þú ert út á landi og í Reykjavík.
Þú neyðist til að keyra í gegnum úthverfin í Reykjavík þó þar sé ekkert sem biðji mann um að stoppa. Krummaskuðin úti á landi eru miklu stöðvunarvænni. Þar er jú allt í hnotskurn á einum bletti, örheimur í örheimi. Mörg krummaskuð búa líka yfir skemmtilegri höfn, fjallhring gamaldags verslun þar sem allt fæst. Krummaskuð úti á landi eru reyndar aðeins lengra í burtu frá umheiminum en Reykjavík en þar munar ekki miklu. Það eina sem greinir Reykjavík frá krummaskuðum á landsbyggðinni er miðbærinn. Miðbærinn er Reykjavík. Úthverfin eru svo sannarlega stór krummaskuð.
Krummaskuð eru þrátt fyrir allt dálítið skemmtilegir örheimar þannig að
íbúar þeirra krummaskuða sem lentu á lista í Fréttablaðsins geta alveg
haldið ró sinni.
Kveðja,
Konni

Konni getur ekki komið frekar en prinsessan ... en skellið ykkur endilega

2006-11-28T11:26:00.000Z

Nú eru þjóðfélagsrannsóknir og stúdíur Konna í hinum kynlegu fræðum farnar að spyrjast út því Konni fék boð um að taka þátt í seminar á erlendri grundu. Því miður gat Konni ekki lagt land undir fót en þeir sem eru í Köben í dag ættu að skella sér á þenna fróðlega fyrirlestur um Sigmund Freud og prinsessuna sem gat ekki komið ... frekar en Konni. Prinsessur hafa nefnilega svo mikið að gera.

30. november:
Steen Kristensen
Prinsessen, som ikke kunne komme - om Sigmund Freud og Marie Bonaparte
Prinsesse Marie Bonaparte (1882-1962) var rig, begavet, berejst og en af Freuds kæreste elever. Alligevel følte hun sig som en mislykket kvinde, fordi hun ikke fik orgasme ved almindeligt samleje. Hun forsøgte at kurere sig selv ved hjælp af utroskab, sexologisk forskning, psykoanalyse og klitoriskirurgi. Men alt var forgæves. Forklaringen ligger lige for, hævder Steen Kristensen, som i foråret udgav bogen Freud har sagt - en tredobbelt biografi om prinsessen, hendes mand (prins Georg af Grækenland og Danmark) og Sigmund Freud. Sandheden var bare så grufuld, at ingen turde tænke den.

Sted: Psykiatrisk auditorium (Rigshospitalet), Henrik Harpestrengs Vej, opgang 61a
Tidsrum: Kl. 16-18
Målgruppe: Alle interesserede
Arrangører: Dansk Forening for Klinisk Sexologi og Sex & Samfund
Kontakt: www.klinisksexologi.dk og www.sexogsamfund.dkAdgang: Gratis

Kveðja,
Konni

Það rignir ekki alveg jafnt á réttláta og hina ranglátu

2006-11-26T11:23:00.000Z

Nú eru menn heldur betur farnir að leika sér með milljarðana. Tveir íslenskir bubbar keyptu enskt knattspyrnufélag. Menn eru orðnir svo ríkir að þeir geta bókstaflega leikið sér með peninga. Kaup á knattspyrnufélagi eru í mínum huga ekkert annað en fjárhættuspil því öll vitum við að gengi slíkra félaga er fallvalt jafnvel þó íslensk ofursnilli sé í spilinu.
Hér í gamla daga var til hugtak sem var mikið notað en það er hugtakið arðrán. Alþýðan vissi að það var hún sem borgaði fyrir flottræfilshátt og bruðl yfirstéttarinnar. Alþýðan gerði svo byltingar til að rétta kúrsinn. Hugtakið arðrán er sjaldan eða aldrei notað nú á dögum jafnvel þó yfirstéttin á Íslandi leiki sér með milljarðana á hugvitsamlegan hátt. Fljúgi um á einkaþotum, aki um á rándýrum sérvöldum bifreiðum, byggi sér sumarbústaði á stærð við villur í Arnarnesinu, byggi sér hallir, kaupi upp sveitir landsins og eigi fiskinn í sjónum.
Hugtakið arðrán dúkkar aldrei upp á yfirborðið. Nei, alþýðan fagnar og gleðst yfir dugnaði og snilli yfirstéttarinnar.
Mikið hefur breyst síðan í gamla daga þegar menn gerðu franskar og rússneskar byltingar. Þá var svo augljóst hvar uppspretta auðsins var. Nú fagnar alþýðan því það er eins og auður þessara manna rigni af himnum ofan. Fyrst það hellirignir á hina réttlátu þá gætu líka nokkrir dropar fallið á hina ranglátu. Það er von alþýðunnar árið 2006.

Kveðja,
Konni
PS. Hvaðan koma svo milljarðarnir sem yfirstéttin leikur sér með?

Óravíddir mannshugans eða bernskudvöl Dr. Gunna

2006-11-24T08:51:00.000Z

Dr. Gunni skrifar í gær ágæta bakþanka í Fréttablaðið. Hann er að fagna því að Georeg Clooney skuli hafa verið kosinn kynþokkafyllsti maður heims af ameríska blaðinu People. Fögnuður Dr. Gunna stafar af því að Clooney er fjórum árum eldri en hann svo Dr.Gunni telur sig eiga alla möguleika á að halda kynþokkanum í all mörg ár enn þó árin færist yfir. Ég samfagna Dr. Gunna því aldur færist líka yfir Konna og gott er til þess að vita að aldur þurrki ekki sjálfkrafa út kynþokka okkar karlmanna, eða eins og Dr. Gunni orðar það: "Það er ekki bara það að hallærislegri ungmenndýrkun sé gefið á baukinn með þessu vali heldur er mér líka gefin smá von."
En ástæðan fyrir því að ég sé ástæðu til að minnast á pistil Dr. Gunna er sú að Gunni telur það til marks um ferskleika sinn og síungt hugarfar að hann skuli ekki vera farinn að stunda golf, safna þjóðbúningadúkkum og hlusta á klassíka tónlist. Það var þetta síðasta þ.e. að hlusta á klassíska tónlist sem kom við kaunin á Konna. Dr. Gunni telur sem sé að þeir sem hlusti á klassíska tónlist missi ferskleikann. Þar datt Dr. Gunni í fúlan drullupytt. Dr. Gunni heldur sem sé að mannsandinn sé svo takmarkaður að sá sem hlusti á klassíska tónlist hafi ekki andlegt til rými til að hlusta líka á aðrar tegund tónlistar. Ég get sagt Dr. Gunna að margir þeirra sem hlusta á klassíska tónlist eru meðal þeirra ferskustu sem ég þekki. Þeir hafa nefnilega þroskast. Á meðan Dr. Gunni dvelur í hugarfarslegum æskuheimi er til fólk sem hlustar á Beethoven, Mozart, Bach, Wagner, Brahms, Feldmann, Schostakovich, Atla Heimi og Jón Leifs en hefur auk þess dálítið gaman af prumpulögum.
Kv
Konni
PS. Fyrir þá sem ekki vita þá er Dr. Gunni höfundur hins ágæta Prumpulags sem vinsælt var fyrir nokkrum árum.

Hver er gáfaðasti núlifandi Íslendingurinn?

2006-11-22T21:58:00.000Z

Ég álpaðist til að opna könnun sem mér barst í tölvupósti í dag. Könnunin var nú þannig að mér datt í hug að einhver væri að grínast með mig. Hún hófst sakleysislega. Fyrst var ég spurður um hvaða stjórnmálaflokk ég myndi kjósa og síðan kom spurning um hvaða stjórnmálamanni ég myndi treysta best til að leiða ríkisstjórn. Þetta voru nú frekar þægilegar spurningar og þeim var auðsvarað. En síðan fóru nú málin heldur betur að flækjast, sérstaklega þar sem tveir vinnufélagar mínir stóðu yfir mér, því næsta spurning var óvænt. Hversu oft hefur þú haldið framhjá? Næsta spurning var heldur ekki þægileg með vinnufélagana á herðunum. Hversu marga rekkjunauta hefur þú átt um ævina? Ég rak vinnufélagana í burtu, þeim til mikillar gremju, svaraði spurningunum og smellti áfram. Þá kom hins vegar spurningin sem ég átti erfiðast með að svara. Ég velti því fyrir mér hvort ég gæti yfirleitt svarað henni á heiðarlegan hátt, en spurningin var: Hver er gáfaðasti núlifandi Íslendingurinn?
Ég þekki marga gáfaða Íslendinga. Reyndar eru flestir ef ekki allir sem ég þekki gáfaðir, hver á sinn hátt. En hver skyldi vera gáfaðasti núlifandi Íslendingurinn??
Ég mundi bara ekki eftir neinum svo ofurgáfuðum að hann bæri með rentu titilinn Gáfaðasti Íslendingurinn 2006.
Þegar ég var í þann veginn að koma mér hjá að svara spurningunni datt mér einn í hug ... Guðbergur Bergsson ...
Kveðja,
Konni

Íslendingar eru ósigrandi ... nema í íþróttum

2006-11-21T16:34:00.000Z

Við Íslendingar höfum alltaf átt svolítið bágt vegna skorts á alheimsíþróttakempum, alvöru heimsmeisturum. Reyndar eigum við þrjá Olympíumeistara þó enginn landi okkar hafi hlotið gull á þeim merku leikum.
Handboltalandsliðið hefur alltaf verið veik von um heimsmeistaratign og alheimsfrægð en sá draumur hefur alltaf endað í átakanlegri þjóðarmartröð. Það hefur reyndar bjargað málunum að íslenskar konur hafa hlotið heimsmeistaratign fyrir fegurð, íslenski hesturinn þykir einstakur og Jón Páll var sterkasti maður heims en samt sem áður vantar okkur alvöru heimsmeistara og handhafa alvöru Olympíugulls.
Það gleður mig því mikið að íslenskir viðskiptamógúlar skuli nú hafa nú lagt undir sig hvert fyrirtækið á eftir öðru á erlendri grundu. Það sannar að við Íslendingar getum komist í fremstu röð hvar sem er í hverju sem er ... nema í íþróttum.
Nú hafa tveir viðskiptaspekúlantar keypt enskt knattspyrnufélag á tuttugu milljarða. Ég tel þau viðskipti séu ótvírætt afrek á heimsmælikvarða og ígildi Olympíugulls eða heimsmeistaratignar íslenska landsliðsins í handbolta. Hættum þessu streði í íþróttunum (íslenska knattspyrnulandsliðið er hvort sem er í 100 sæti á heimslistanum) sendum fulltrúa á þann vettvang þar sem sigurlíkur eru margfalt betri en í íþróttum.
Á réttum vettvangi getum við nefnilega sigrað heiminn. Við erum þjóðin ósigrandi ... í öllu nema íþróttum.
Kveðja,
Konni

Mamma hvar eru leiðbeingarnar með geisladiskinum sem þú keyptir?

2006-11-20T15:09:00.000Z

Ég var að vafra milli stöðva í sjónvarpinu um helgina. Datt þá niður á þátt þar sem dægurlagasöngkona nokkur var að gefa áhorfendum hugmyndir um hvar og hvernig megi nota nýútkominn disk söngkonunnar. Mér þótti þetta merkileg pæling því ég hef aldrei talið mig þurfa á leiðbeiningum að halda um notkun þeirrar tónlistar sem ég kaupi. En sem sagt, söngkonan sagði að nota mætti diskinn m.a. á kvöldin við kertaljós, í teitinu, við eldamennskun og við ryksugun og tiltektir. Reyndar finnst mér ekki gott að hlusta á tónlist þegar ég ryksuga en hugsanlega getur þessi tónlist samtvinnast hávaðnum í ryksugunni á athyglisverðan hátt. En er það ekki lýsandi dæmi um hvernig tónlist er að verða neyslunni að bráð eins og flest annað að gefa þurfi út leiðbeiningar um hvar hana megi nota? Erum við að tapa áttum? Eða er markaðssetningin orðin eitthvað skrýtin? Er er þetta IKEA-væðingin?

Örleikrit

Mamma og Jón tala saman á aðfangadagskvöld

Mamma: Af hverju hlustar þú ekki á diskinn sem ég gaf þér í jólafjöf elskan?

Jón: Það vantar leiðbeiningarnar!

Mamma: Guð minn góður er diskurinn gallaður?

Jón: Já og ég hef ekki humynd um hvar ég á að spila hann.

Við verðum að fá leiðbeiningarnar.

Kv.
Konni

Syndin er lævís og lipur

2006-11-18T22:16:00.000Z

Enn og aftur fær Konni sönnun fyrir dyggðugu líferni sínu á sjónvarpsstöðinni Ómega. Eins og sjá má hér að neðan var Konni aðeins hársbreidd frá því að skrá sig á einkamála og stefnumótalínu visis.is. Sá hann að sér á síðustu stundu ... guði sé lof.
Um miðjan dag í dag stillti Konni svo á Ómega. Þar saup innblásinn prédikari hveljur yfir holdsins fýsnum. Sagði prédikarinn að það væri eitt megin verkefni mannsins að hafa hemil á holdinu. Holdið væri nefnilega í flestum tilfellum óskaplega veikt.
Konni hefur ætíð fetað hinn mjóa veg dyggðarinnar þó hann hafi eitt andartak látið sig dreyma um að skrásetja sig á stefnumótalínu visis.is. Það var feilspor ...sem þó ekki var stigið. Bendir það ekki til góðrar og Ómegískrar holdlegrar stjórnunar og sjálfsaga?
Veiklundað fólk sem á í sífelldri baráttu við holdlegar fýsnir sínar, skráir sig á stefnumótalínur og hugsar blautlegar hugsanir í tíma og ótíma þarf nú ekki annað en að hugsa til Konna og hans dyggðuga lífs og þá mun kúrsinn réttast eða stilla bara á Ómega. Já, syndin er svo sannarlega lævís og lipur.
Verið dyggðug!
Kv.
Konni

Að eiga séns eða eiga ekki séns?

2006-11-18T01:00:00.000Z

Ég hef heyrt að fólk láti fasteignasala stundum verðmeta fasteignir sínar í þeim tilgangi einum að kann ríkidæmi sitt. Þetta er svona stöðukönnun. Hvert er verðgildi eignar minnar? Mér datt þetta í hug um daginn þegar ég kíkti inn á nýja útgáfu af vefsíðunni visir.is. Á þeirri síðu er stór bleikur hnappur með fyrirsögninni einkamál/stefnumót. Þar geta þeir komið sér á framfæri sem ekki eiga í örugga hlýju hjónasængur að venda. Svo virðist vera að mikið sé til af einmanna fólki á öllum aldri með mismunandi ástríður. Á visi.is er t.d. skráð kona undir dulnefninu allfjörug. Í ljós kemur reyndar að allfjörug er ekki einsömul því hún er í raun par sem sækist eftir öðru pari með skemmtilegan leik í huga. Þar er líka dama sem skráð er undir dulnefninu strap on. Hennar auglýsing hefur verið skoðuð 622 sinnum. Strap on leitar eftir skyndikynnum svo lítil hætta er á að þeir sem heimsækja hana þurfi að ganga með henni upp að altarinu. Þar er líka Chanel sem vill tala við stráka og hefur áhuga á útiveru og hestum. Já, það er mikið af einmanna fólki á Íslandi á öllum aldri.
Eða ... getur verið að fólk sé bara að kanna hvort það eigi séns rétt eins og íbúðaeigendurnir sem eru að láta fasteignasala verðmeta íbúðir sínar þó alls ekki sé ætlunin að selja.
Nú er Konni að hugsa um að skrá sig á einkamála/stefnumótasíðuna á visi.is bara til að kanna stöðuna. Yrði ekki gaman að fá athygli hundruða eða þúsunda áhugasamra kvenna á einu bretti.

Eða ... kæmi kannski á daginn að enginn hefði áhuga? Á Konni að þora að taka þá áhættu?
Kveðja,
Konni
P.S. Annars skilur Konni ekki hvernig fólki dettur í hug að standa í þessu veseni á okkar litla landi. Í fyrsta lagi er þetta ósiðlegt og svo eru jú talsverðar líkur á að þú lendir á einhverjum sem þú þekkir ...úps! Konni er hættur við.

Nauðsynlegur dagur

2006-11-16T21:48:00.000Z

Í Kastljósi í gær var fjallað um hvers vegna drukkið fólk fær slagandi göngulag. Rætt var við dósent í Háskólanum. Hann eða reyndar hún, því þetta var kona, sýndi stórt líkan af eyranu. Síðan fitlaði dósentinn við eyrað og útskýrði vandræðaganginn í drukknu fólki á fræðilegan hátt. Ástæðuna fyrir þessari slagandi gangtegund drukkins fólks er sem sé að finna í eyranu. Þetta fannst mér kynlegt. Þá fékk ég loksins skýringu á merkingu orðtaksins að vera á eyrunum og það á degi íslenskrar tungu. Já, þetta er svo sannarlega þarfur dagur.
Kv.
Konni
P.S. Hafa lesendur ekki líka heyrt af því að vera á perunni eða skallanum eða á felgunni? Svo geta menn verið á snúrunni þegar þeir eru búnir að fara í meðferð.

Þau tíðkast nú hin breiðu bökin

2006-11-15T13:43:00.000Z

Í gær fjallaði ég dálítið um hinn innri og ytri mann. Ég var rétt búinn að skrifa pistilinn þegar ég rakst í fjölmiðlum á mynd af manni sem sloppið hafði úr haldi fangavarða og uppskar þjóðarathygli. Af myndinni að dæma er hér ekki um hættulegan mann að ræða. Myndin sýnir dagfarsprúðan rólyndismann. Svo kemur á daginn að lögreglan vill hafa hendur í hári hans sem fyrst því þessi góðlegi maður gæti verið hættulegur. Þetta sýnir að hinn ytri maður stendur ekki fyrir eitt né neitt. Hinn ytri maður getur gert tæknilega feila. Þessi maður gerði til dæmis þann tæknilega feil að flytja inn eiturlyf. Svo bætti hann öðrum tæknilegum feil við og strauk frá fangavörðum. Árni verðandi þingmaður segist að eigin sögn hafa gert tæknilega feila sem lentu á hans breiða baki. Verst er að strokufanginn sýnist frekar grannur. Hann gæti því kiknað undan feilunum. Kannski þingmaðurinn geti hlaupið undir bagga.
Gott er að hafa breitt bak og geta hlaupið undir bagga.
Kveðja,
Konni

Hinn innri maður kemur alltaf í ljós

2006-11-14T08:30:00.000Z

Nú fer Árni úr Eyjum aftur á þing. Það finnst mér miður. Hann er reyndar búinn að taka út sína refsingu. Gerði það með stæl. Samt er ég ekki sannfærður um erindi hans á þing. Það er vegna þess að ég veit ekki hvort hans innri maður hefur betrast. Hinn innri maður skiptir meira máli en sá ytri. Því miður höfum við ekki aðferðir til að skoða hinn innri mann svona frá degi til dags en hann kemur í ljós fyrr en síðar.
Hinn innri maður kemur ekki fram í prófkjörsauglýsingunum. Þessar fínu brosmyndir af fólki úr öllum flokkum segja mér ekkert.
Mikið væri gaman að eiga myndavél sem myndaði hinn innri mann.
Það kom mér á óvart í fréttunum í gær hversu margir vegfarendur voru hæst ánægðir með að umræddur væntanlegur háttvirtur þingmaður skyldi vera með annan fótinn á þingi. Það sem mér finnst vera mikið álitamál finnst öðrum vera fagnaðarefni.
Er það ekki kynlegt?
Ég vona svo sannarlega úr því sem komið er, að innri og ytri menn væntalegs þingmanns mun verða þjóðinni til gæfu og sóma.

Kv.
Konni

Í skauti afþreyingarpostula

2006-11-13T08:21:00.000Z

Mér finnst hún alltaf dálítið kynleg og leiðinleg þessi umræða að það þurfi að selja Ríkisútvarpið. Þar fara yfirleitt í fararbroddi ýmsir snillingar sem vilja íslenskri menningu svo óskaplega vel...eða svo segja þeir a.m.k.Reyndar mætti hugsanlega leggja niður Rás tvö og svo sem sjónvarpið líka en alls ekki RÁS EITT. Í Fréttablaðinu í gær er grein eftir mann, sem ég flokka í hóp plebba en sá vill selja Ríkisútvarpið ... eða bara leggja það niður. Hann segir að þá fyrst verði til fyrsta flokks íslenskur afþreyingariðnaður.
Fyrsta flokks afþreyingariðnaður?
Hann er ekki að tala um ljóðalestur, jazz, umræður um bókmenntir, umræður um heimsspeki, flutning klassískarar tónlistar, nútímatónlistar eða þjóðtónlistar, flutning alvöru leikrita eða lestur útvarpssögunnar viðtöl við skáld og merka Íslendinga sem hafa eitthvað að segja, þáttinn Hlaupanótuna eða sunnudagsmessuna eða Orð kvöldsins.
Nei, ég held að hann hafi verið að tala um Idol, Strákana, X-Factor, Knattspyrnufélgið Nörd, beinar útsendingar frá fegurðarsamkeppni Íslands og Reykjavíkur og Óskarsverðlaunafhendingunni, bullið í FM-stöðvunum, Innlit-útlit, flutning Nylonískrar dægurtónlistar og dægurmenningar eingöngu svo og endalausa enska knattspyrnu og spænska knattspyrnu og það nýjasta af Paris Hilton og Britney Spears.
Plebbar skilja ekki hugtakið menning en þetta áðurnefnda hugtak, afþreying skilja þeir vel. En það sem gerir þá viðsjálverða er að þeir hafa viðskiptavit og kunna að selja. Sitjum við ekki öll uppi með eitthvað sem tungulipur sölumaður hefur prangað inn á okkur? Í fávisku sinni halda þeir að afþreying og menning sé sama hugtakið. Í Stúdentablaðinu um daginn sagði Guðbergur Bergsson að enginn vafi léki á að til væri hámenning og lágmenning. Afþreyingariðnaður er lágmenning, þar er ég jafn viss og Guðbergur. Greinarhöfundurinn í Fréttablaðinu í gær er fulltrúi lágmenningar.En skoðum aðeins þetta hugtak afþreyingariðnaður. Það er samsett úr hugtökunum afþreying og iðnaður. Afþreying minnir mig alltaf á orðtakið að þreyja þorrann og góuna. Þ.e. reyna að þrauka. Afþreying á að létta okkur lífið, hjálpa okkur að þrauka. Lífið er nefnilega svo leiðinlegt, að mati plebba, að allt sem er alvarlegt og ígrundað gerir stundirnar lengri ... lengir lífið og það er vont. Afþreying styttir hins vegar stundirnar. Lífið verður styttra og það er gott. Við þurfum sem sagt hjálpafþreyingariðnaðarins til að lífið verði ekki allt of langt og leiðinlegt. Hugtakið iðnaður tengist svo í mínum huga BM-Vallá eða Vilko-súpum eða álframleiðslu, fyrirtækjum sem eru í færibandaframleiðslu eða fjöldaframleiðslu. Iðnaður er auðvitað bráðnauðsynlegur en þegar það hugtak fer að snerta hugtakið menningu fara mín aðvörunarljós að blikka. Fyrrnefndur greinarhöfundur er talsmaður firringar en ekki menningar. Firring er fylgifiskur afþreyingar og afþreying er fylgifiskur firringar.
Lengi lifi RÁS EITT!
Kveðja,
Konni

Er júróvisíón-gospel trúartónlist eða komin úr neðra?

2006-11-10T22:36:00.000Z

Ég var að horfa á kristilegu sjónvarpsstöðina Omega. Þar er nú flest betra á dagskránni en á öllum hinum stöðvunum samanlagt sem (þ.e. á hinum stöðvunum) sýna afþreygingarkjaftæði að mestu. Allavega er það næringarlaust með öllu. Þó er það eitt sem ég á erfitt að sætta mig við á Omega og það er tónlistin sem er flutt á samkomum hjá þessum söfnuðum sem þar eru kynntir, íslenskum jafnt sem útlendum. Það er eins og þeir hafi ráðið alla Júróvisíón lagahöfunda heimsins til að semja þetta sem þeir kalla trúartónlist. Ef eitthvað er komið úr neðra er það Júróvisíóntónlist. Hvað er Guð að pæla? Svo þykist þetta fólk vera frelsað en að mínu mati eru þeir sem leika danstónlist í kirkjum, þó Guð og Jesús séu þar nefndir í öðru hverju orði, ekki almennilega frelsaðir. Í mesta lagi hálf-frelsaðir. Hvernig fór ekki líka með dansinn í kirkjunni í Hruna hér forðum?
Þetta fólk hefur aldrei dillað sér við Bach? Það á sko mikið eftir. Bach samdi flottustu trúartónlist sem nokkurn tíma hefur verið samin.
Svo er það annað. Þegar ég lærði sögu var mér kennt að eitt meginatriðið í siðbót Lúthers hafi verið að færa lofgjörðina yfir á mál sem venjulegt fólk skildi, þ.e. móðurmálið. Nú er þetta Júróvisíón-gospel oftar en ekki sungið á ensku hjá íslenskum söfnuðum. Það eina sem maður skilur er Djísús og hallelúja. Er þörf á nýrri siðbót? Allavega þó nokkurri bragarbót.
Kveðja til allra
Konni

Baðvörður rekinn upp úr

2006-11-09T19:48:00.000Z

Í gær var sérkennileg grein í Blaðinu. Hún var mjög skrýtið innleg í prófkjörsbaráttu ákveðins flokks (sem ég nefni ekki hér því ég er í fýlu út í flokkinn eftir að mín kona hlaut ekki almennilegt brautargengi í prófkjöri um daginn) en í greininni segir fyrrverandi sundlaugarvörður í Vesturbæjarlauginni sínar farir ekki sléttar. Kíkjum aðeins á kafla úr greininni.

Fljótlega eftir að ég byrjaði starfið fór ég að taka eftir, að ekki var allt með felldu í sánagufu karla. Kvartaði ég við forstöðumann laugarinnar um þetta ástand og spurðist fyrir um það hjá öðru starfsfólki laugarinnar hvort það gæti verið rétt, að vændi væri stundað þar. (tilv. lýkur)

Þetta er háalvarlegt mál sem hér verður ekki haft í flimtingum. En mér er spurn var verðskrá yfir athæfið í afgreiðslu laugarinnar? Hvernig báru væntanlegir kaupendur sig að í afgreiðslunni ef þeir ætluðu að stunda þetta ógeðfelld athæfi í sánaböðum karla. Var það t.d.: Ég ætla að fara í gufu og svo gera líka þú veist... eða Ég ætla að fara í GUUUUfu! og skyldi maður hafa getað borgað fyrir þetta með klippikorti? Svo finnst mér það fyrir neðan allar hellur ef menn hafa ekki þvegið sér án baðfata áður en athæfið átti sér stað. Hver leit eftir því? Þetta er nú einu sinni opinber baðstaður. Þess ber að geta að baðvörðurinn var rekinn fyrir að vekja athygli á þessu. Er sannleikurinn ekki oft lyginni líkastur?
Kv.
Konni

Gott aðkast er gulli betra

2006-11-08T12:52:00.000Z

Fyrir helgi var viðtal í Morgunblaðinu við þrjá einstaklinga fyrir Austan sem sannarlega höfðu orðið fyrir aðkasti og næstum ofsóknum vegna skoðana sinna á Kárahnjúkaframkvæmdum. Maður skilur vel að slíkt fólk hafi orðið fyrir aðkasti. Eiginlega er ég hissa á að þetta fólk skuli ekki hafa orðið fyrir meira aðkasti. Almenningur verður sífellt að vera á varðbergi og það var hann svo sannarlega í þessu máli. Annars hefði svona fólk getað komið í veg fyrir þetta þjóðþrifamál. Allir mega auðvitað hafa sínar skoðanir en við sem tilheyrum almenningi verðum samt að gæta þess að þessar skoðanir eyðileggi ekki fyrir okkur hinum. Við verðum alltaf að gæta þess að meiri hagsmundir víki fyrir minni hagsmunum.
Nú er það ekki bara rafmagn sem flæðir um sveitir Fljótsdalshéraðs. Nei, það er hamingja í milljónum gígavattstunda. Hvað gerir til þó þrír náttúruverndarsinnar hafi orðið fyrir smá aðkasti? Þökk sé almenningi. Hann hefur alltaf rétt fyrir sér og sigrar því að lokum. Gott aðkast er gulli betra.
Kv.
Konni

Engan rasisma hér takk!

2006-11-07T12:55:00.000Z

Við Íslendingar eigum svo margt ólært. Stríðir straumar útlendinga munu bara verða til bóta fyrir okkur. Ég get nefnt gott dæmi. Þannig var að ég flaug fyrir nokkrum árum til London. Við hlið mér sat maður sem var á leið til Asíu í ákveðnum erindagjörðum. Á fimmta gin-glasi sagði hann mér erindi sitt til Asíu en það verður ekki tíundað hér. Hins vegar tjáði hann mér að nýlega hefði hann skilið við íslensku konuna sína og tekið svo til nærri samdægurs saman við eina asíska. Maðurinn átti ekki til orð yfir hversu gríðarlega góð breyting þetta var. Nánast bylting á högum mannsins. Asískar eiginkonur væru bara annar klassi eins og hann orðaði það. Nú sést aldrei rykkorn á heimili mannsins, maturinn er til á réttum tíma og inniskórnir alltaf á sínum stað. Segið svo að útlendingar hafi ekki jákvæð áhrif á samfélagið.
Kv.
Konni

Takið þingmannsefni í fóstur

2006-11-04T10:17:00.000Z

aÍ gamla daga í sveitinni fór maður á kjörstað og skrifaði niður nöfn þeirra sem manni leist best á að myndu nú stjórna hreppnum skynsamlega. Ekki man ég eftir að nokkur maður hefði haft samband við mig og beinlínis beðið mig um að kjósa sig.
Nú er öldin önnur. Stjórnmálamenn auglýsa sig grimmt þessa dagana. Margir vilja á þing. Enginn veit hver borgar þessar auglýsingar. En að sjálfsögðu eru einhverjir sem sjá sér hag í því að þessi eða hinn komist á þing. Einn af þeim er ég. Ég vil alveg endilega að Jónína Rós komist á þing. Það er minn hagur. Þá þekki ég loksins almennilega einhvern þingmann. Þekki reyndar Össur og Þuríði og Einar Má, jú og auðvitað Kötu Ásgríms varaþingkonu, en ekki svona almennilega eins og Jónínu Rós. Það er málið.
Þegar ég er búinn að auglýsa hana svona mikið á síðunni minni, henni að kostnaðarlausu, þá á ég líka inni hjá henni stórgreiða. Allavega lít ég þannig á málið.
Ég gæti orðið söngstjóri í þingmannaveislum eða Samfylkingarpartíum samið leikrit fyrir ungliðahreyfingu Samfylkingarinnar, málað myndir í þingflokksherbergið, þjálfað hlaupaklúbb þingmanna eða orðið einkabílstjóri Jónínu þegar hún verður orðin ráðherra.
Enn eitt er víst að ef þið leggið ekki þingmannsefnum lið með einum eða öðrum hætti í prófkjörum missið þið af frábæru tækifæri til að komast til áhrifa.
Áskorun!
Takið þingmannsefni í fóstur eins og ég.
Ykkar Konni

Særður kórstjóri

2006-10-30T18:46:00.000Z

Kunningi minn sem er kórstjóri í virðulegum átthagakór er mjög sár þessa dagana eða eiginlega algjörlega miður sín. Ástæðan er sú að áhrifakona í tónlistarbransanum ruglar honum alltaf saman við parketlagningarmann.
Þegar kórstjórinn hittir þessa konu minnist hún aldrei á tónlistarafrek hans. Hún talar hins vegar mikið um að nú þurfi hún að fara að skipta um parket, þessi eða hin spýtan sé laus eða vill fá almennar ráðleggingar um parketlagnir. Þetta sárnar kórstjóranum.

Konan minnist ekki á tónlistarafrekin eða átthagakórinn.
Það er nú ekki svo að parketlagnir séu ekki virðingarverð atvinnugrein en það er ansi neyðarlegt þegar störf manns á sviði listarinnar eru ekki eftirminnilegri en svo að það fyrsta sem kemur upp í huga áhrifakonu í bransanum, þegar hún hittir kórstjórann sjálfan, séu parketlagnir.

Þetta ekkert annað en gengisfelling á manninum, nánast eins og spark í viðkvæman stað. Ég veit að honum hefði ekkert sárnað þó honum hefði verið ruglað saman við stjórnanda Sinfóníuhljómsveitarinnar eða einhvern frægan hljóðfæraleikara...en parketlagningarmann, verra gat það ekki verið.
Ég hef nokkra reynslu á þessu sviði því einu sinni var mér ruglað saman við frægan leikara, sjálfan Róbert Redford. Það var sko ekki gengisfelling. Að líkjast frægri persónu styrkir sjálfstraustið svo óskaplega mikið. Ég lifi enn á þessu. Þess vegna finn ég svo innilega til með kórstjóranum sem er ruglað saman við parketlagningarmann.
Kv.
Konni

Elskum niður verðbólguna eða er ást hagkvæm?

2006-10-28T22:57:00.000Z

Að mínu mati felst mesti fjársjóður hvers samfélags í þeirri orku sem ástin er. Þess vegna hlýtur ást að vera hagkvæm fyrir þjóðarbúið. Og það sem meira er samlíf hjóna styrkir ónæmiskerfið, það hafa rannsóknir sýnt. Fólk sem iðkar samlíf af krafti þarf síður á samfélagslegri þjónustu að halda. Öflugt samlíf hjóna stórbætir andann í samfélaginu og hjón eða sambúðaraðilar af öllu tagi ættu að njóta samfélagslegrar umbunar ef sýnt er fram á líflega samlífsiðkun. Þetta ættu frjálshyggjumenn jafnt sem jafnaðarmenn að athuga.
Ef ég væri á þingi myndi ég koma á fót Samlífsstofnun sem hefði þær skyldur að mæla samlíf í samfélaginu. Daglega yrði birt vísitala samlífs sem hefði beina tengingu við stýrivexti Seðlabankans. Eftir því sem þjóðin elskaðist meira því lægri yrðu vextirnir. Þjóðin gæti sem sé elskað niður verðbólguna. Þannig yrði verðbólgan í höndum okkar allra. Einhleypt fólk gæti svo lagt sitt af mörkum með samfélagslegri ást eða kærleika af ýmsu tagi. Samlífsvísitalan yrði birt í kvöldfréttum sjónvarpsstöðvanna þannig að öll pör landsins gætu gengið til náða vitandi til hvers væri ætlast af þeim.
Stöðvum verðbólguna!

Með nafla úr Nyloni

2006-10-26T23:53:00.000Z

Nú ligg ég íðí. Ég þarf að fá mér tattú. Ástæðan er sú að ég get ekki lengur farið í sund eða afklæðast á almannafæri. Ég er nefnilega óhúðflúraður. Ég er einn af þeim fáu sem ekki hef skreytt líkamann. Hérna áður fyrr voru það bara sjóarar sem höfðu látið flúra sig í útlöndum. Ég stóð í þeirri trú að það hefðu þeir gert útúrdrukknir. Því engir nema útúrdrukknir sjóarar létu flúra sig. Þeir sátu síðan uppi með fylleríið ævilangt. Nú þarf ekki fyllerí til. Fólk á öllum aldri streymir til flúrara og lætur setja á sig tattú. Um hábjartan dag fara jafnvel huggulegustu konur og láta flúra sig. Ekki myndir af berum skvísum og akkerum eins og sjóararnir gerðu, nei nú eru það austurlensk tákn og hinar furðulegustu myndir. Ég hef meir að segja séð mann með Nike merkið á hendinni. Svo er þetta út um allt á fólki. Kínverskt tákn á ökklanum þykir sveipað einhverri dulúð og er sérlega sexý. Kínverst tákn milli herðablaðanna er líka dulúðugt en ekki eins sexý. Að sögn táttómeistaranna sjálfra, er hlúðflúr jafnvel á leyndustu stöðum líkamans.
En ég er ekki með tattú!
Úr því þarf að bæta.
Ég hef því ákveðið að láta flúra mig. Þannig verð ég aftur gjaldgengur í hvaða sundlaug sem er.
Þetta er samt ekki eins auðvelt mál og ég hafði ætlað.
Hvar ég á að láta setja flúrið og hvernig á myndin að vera? Þetta hefur valdið mér miklu hugarangri síðustu daga.
Staðsetning húðflúrs er nefnilega mjög mikilvæg.
Myndin er steitment og staðsetningin líka svo þetta verður að vera úthugsað því maður eyðir ekki tattúi með því að fara í bað. Mitt tattú á að vera á mjög áberandi stað a.m.k svo það sjáist vel í sundi og ekkert Kína-tákn.
Af hverju flúrar fólk ekki á sig umferðarmerki. Þar ættu flestir að geta fundið eitthvað við sitt hæfi.
T.d. merkið reiðmenn, eða vegur þregnist eða jarðgöng eða takmarkaður ásþungi? Þetta yrði skemmtilegt. Þessi Kínatákn eru svo ófrumleg.

Ég fékk hugmynd. Hvernig væri að flúra á mig allar stelpurnar í Nylon.
Spurningin er bara hvar á ég að koma þeim fyrir? Kannski í kringum naflann?
Kv.
Konni

Kona sem skýtur með vinstri

2006-10-24T13:28:00.000Z

Samfylkingin er flokkur sem ætti að höfða til flestra. Flokkurinn er nefnilega þeirrar náttúru að vera með og á móti öllum málum. Það hentar vel okkur sem fylgjumst með hinum kynlegu hliðum tilverunnar. Nú alveg á næstunni ætlar flokkurinn að velja fólk á lista fyrir kosningarnar í vor. Reyndar er í gildi auglýsingabann hjá flokknum svo það er ekki nema á færi stjórnmálafræðinga og leyniþjónustusérfræðinga að þefa uppi hverjir vilja á þing fyrir Samfylkinguna.
Það er nú annað ástandið hjá Sjálfstæðisflokknum. Flenniauglýsingar af dásamlegu fólk.
Um daginn sá ég í eigin persónu rektor háskóla nokkurs í Reykjavík þylja lofþulu um sjálfa sig fyrir fram hóp af fólki á sjálfum Austurvelli. Fólkið var vopnað kvikmyndavél, ljósum, hljóðupptökugræjum og stórum spegli sem endurvarpa átti ljósi á skuggahlið rektorsins. Það er sko ekkert auglýsingabann á þeim bæ. Það er óskandi að auglýsing rektorsins hafi tekist vel.
En þar sem Samfylkingin vill hafa sitt fólk fyrir sig og sína og auglýsa alla jafnt sé ég mig knúinn að auglýsa einn frambjóðanda umfram aðra því sá frambjóðandi má ekki falla milli stafs og hurðar. Reyndar varð ég fyrir nokkrum vonbrigðum með þessa jafnaðarmennsku hjá Samfylkingunni því ég var búinn að hanna auglýsingaherferð fyrir þá sem hér um ræðir. Herferð sem hefði örugglega skilað henni á þing. En ég verð víst að lát nægja þessa bloggsíðu Konna kynlega. Sú sem hér verður auglýst er kona, mikil kostakona og brátt alþingiskona. Kona sem er sannkallaður hvelreki fyrir flokkinn, frábær málsvari lítilmagnans og glöð kona í alla staði. Þetta er Jónína Rós,menntaskólakennari á Egilsstöðum og fyrrverandi barnakennari á Hallormsstað. Annáluð glæsikona til hugar og handa, dönsku- og stærðfræðikennari og hestakona. Nína fer ekki í grafgötur með skoðanir sínar. Nína hefur afgerandi skoðanir og mun því eiga sinn þátt í að rétta kúrs Samfylkingarinnar Jónína er nefnilega ekki með og á móti öllum málum. Þó það þyki gott að geta skotið bæði með hægri og vinstri í fótbolta hentar það ekki í stjórnmálum. Jónína skýtur bara með vinstri. Í handbolta þykir það ótvíræður kostur að geta kastað með vinstri. Skot frá vinstri kemur andstæðingunum alltaf á óvart.
Jónína Rós hefur mikla reynslu af því að koma fram og kemur vel fyrir sig orði. Hennar minnast Vallamenn af þorrablótum á Iðavöllum og fyrir mörgum árum var Nína í hlutverki Fjallkonunnar á 17. júní á Egilsstöðum fór sú athöfn fram í tjaldi í Egilsstaðaskógi.
Nýlega barst mér bréf frá Nínu. Okkar hugmyndir um störf á hinu háa Alþingi fara alveg saman svo mér er það mikið kappsmál að veldi hennar verði sem mest. Ég birti bréfið með leyfi forseta. Bréf Nínu er svohljóðandi:
Kæri Konni!
Mun innleiða hugmyndir þínar á hið háa Alþingi ef mér verður treyst til setu þar. Er innilega sammála þér um að ástríður eru eldsneyti frjórrar hugsunar og hvers kyns skemmtilegheita. Áfram Konni.
Kveðja frá Nínu í prófkjöri
Austfirðingar, í guðanna bænum kjósið Nínu á þing!
Ykkar Konni

Mikill er máttur brjóstahaldara og síðra nærbuxna

2006-10-21T17:54:00.000Z

Mikill er máttur brjóstahaldara. Rétt stærð af brjóstahaldara getur hækkað konur um 5 sentímetra og grennt þær um 5 kíló. Þessi frétt er í Blaðinu í dag. Í viðtali við konu sem er stílisti kemur fram að flestar konur séu óánægðar með líkama sinn en hún segir: ... að með réttu fötunum geturðu grennt þig, hækkað þig, minnkað rassinn og svo framvegis.
Í greininni er konum síðan gefin fimm góð ráð til að stækka brjóst og fjögur ráð til að minnka rass.
Klæðaburður er sjónhverfing er svo fyrirsögn greinarinnar. Já mikill er máttur brjóstahaldara.
Segjum sem svo að karl og kona felli hugi saman með þvílíkum smelli að óhjákvæmilega þurfi að fjarlægja brjóstahaldarann. Ef konan er með rétta stærð af brjóstahaldara má maðurinn búast við því að konan lækki um 5 sentímetra og þyngist um fimm kíló við þá athöfn. Slík skyndibreyting á konunni gæti komið á óvart og haft afdrifaríkar afleiðingar á sambandið. Væri því ekki bara betra fyrir konur almennt séð að ganga í vitlausri stærð af brjóstahaldara? Er ekki betra að líta út eins og maður er í raun heldur en að líta út eins og maður er ekki?
Hins vegar hef ég verið að velta því fyrir mér hvernig við karlar gætum sjónhverft útlit okkar eins og konur. Hef ég komist að þeirri niðurstöðu að til að sýnast hærri en maður er í raun sé nauðsynlegt að ganga í réttri stærð af síðum nærbuxum. Til að sýnast styttri, ganga um í réttri stærð af íþróttabindi.
Önnur alvarleg líkamslýti sem stílistar kynnu að fetta fingur út í má sjálfsagt fela með ýmsu móti en stóra bumbu og rass mætti til dæmis hylja með því að læra til prests og ganga um í hempu.
Gaman væri ef lesendur legðu nú til góð til karla því hvers eiga þeir að gjalda?
Kveðja
Konni

Getur maður átt mikið undir sér í sundlaugum?

2006-10-19T22:17:00.000Z

Sundlaugar eru kynlegir staðir. Þar eru allir jafnir. Fólk í sturtu er alveg umbúðalaust þ.e. eins og það er af guði gert. Í sturtum er alveg vonlaust að sjá hversu mikið fólk á undir sér. Það vantar umbúðirnar. Um daginn dormaði ég í heitum potti með manni sem ég þekkti ekki neitt. Þessi maður skar sig ekkert úr hópi sundlaugargesta. Hins vegar þegar hann var alklæddur og einkum og sérílagi þegar ég var samferða honum út og sá í hvers konar bíl hann settist upp í rann upp fyrir mér ljós. Ég hafði setið í potti með forríkum manni. Þetta var maður í miklum umbúðum, flottum og dýrum fötum og dýrum og flottum bíl.
Ríkt fólk hefur þá tilhneigingu til að skera sig úr. Það klæðir sig í rándýr föt, á rándýra bíla, býr í rándýrum húsum, kaupir sér jarðir og byggir rándýra sumarbústaði auk allra utanlandsferðanna og hins ljúfa lífs. Auk þess nýtur það þeirra forréttinda að komast í Séð og heyrt, Mannlíf, viðtal við Jón Ársæl og Gestgjafann.
Í sundlaugunum er það hins vegar gersamlega eins og ég og þú.
Þá er það spurning vikunnar:
Getur forrík allsber manneskja, eða bara maður í sundskýlu eða kona í sundbol borið með sér ríkidæmi sitt?
Kv
Konni

Jónas frá Hriflu endurborinn í vinnu hjá Sjóvá

2006-10-19T07:07:00.000Z

Það er ekkert sem fer meira í taugarnar á okkur í kynlegheitunum en plebbar. Plebbar geta verið af ýmsum toga. Það eina sem sameinar þá er heimska og sérílagi þröngsýni. Plebbar halda að nútíminn hafi hafist þegar þeir fæddust. Þetta er yfirleitt hámenntað fólk en er samt að hluta til fávíst. Einn plebbin talar í Fréttablaðinu í gær og vinnur hann hjá Sjóvá. Sjóvá ætlar nefnilega að fara að kaupa listaverk af okkar yngri listamönnum. Það er auðvitað gott. Það ætla þeir að gera með því að selja verk eftir eldri myndlistarmenn jafnvel þá sem eru taldir til okkar gömlu meistara. Þetta er allt gott og blessað. En hver er ástæðan? Jú, verk gömlu meistaranna passa ekki inn í þá ímynd sem Sjóvá vill sýna. Starfsmaðurinn segir: ...okkur þótti rétt að endurskoða í leiðinni (þ.e. í leiðinn og þeir endurhönnuðu skrifstofurnar, insk. Konna) hvernig myndlist við viljum hafa í kringum okkur. Í nýja húsinu er mikið um opin rými, létt er yfir öllu og einfaldleikinn ríkir. Myndlist sendir mjög sterk skilaboð og okkur fannst þau klassíksu verk sem við áttum ekki eiga við þá ímynd sem við viljum skapa." Sem sagt, þetta snýst allt um ímynd. Plebbinn er að kaupa veggfóður af íslenskum myndlistarmönnum. Plebbinn hefur ekki hundsvit á list því fyrir honum er list húsgagn eða mubbla. Skyldi hann hafa kynnt sér list eitthvað sérstaklega, það efast ég um, en hann horfir örugglega á þáttinn Innlit-útlit. Ætli starfsfólkið verði ekki líka hannað, auðvitað verður enginn gamall meistari þar á meðal. Sem sagt list á að selja tryggingar rétt eins og tónlistin frá Mjúsakk átti að örva sölu í stórmörkuðum eða láta fólki líða vel í flugstöðvum.
Á sínum tíma hélt Jónas frá Hriflu sýningu á myndlist sem honum geðjaðist ekki að. Nú er Jónas, endurborinn kominn í vinnu hjá Sjóvá. Við bíðum eftir sýningu á myndlist sem ekki er í tísku. Eða kannski verði hlegið að þessum verkum í næsta þætti af Innliti-útliti.

Þannig er því miður afstaða plebbana til tónlistar og sennilega allra lista sem varð til fyrir þeirra tíð. Hún passar ekki við lúkkið. Þeir fara á örugglega Icelandic Airwaves en slepptu Jóni Leifs. Ætli þeir hafi heyrt af Bach? kv. Kobbi

Íslenska er kynlegt tungumál

2006-10-17T12:11:00.000Z

Margt er það í íslensku máli sem lýkst upp fyrir manni seint og um síðir. Hver man ekki eftir textanum í Heims um ból eða Þorraþrælnum 1866 eða Öxar við ána svo eitthvað sé nefnt. Í æsku og lengi fram eftir aldri var margt í þessum textum mér alveg óskiljanlegt. Hvað þýddi til dæmis Öxar við ána árdags í ljóma....eða signuð mær son guðs ól?
Nú nýlega birtist á vef Morgunblaðsins, mbl.is frétt sem einmit opnaði fyrir mér nokkuð sem ég hef aldrei skilið fyllilega en það er orðtakið "...að hafa á klæðum..." Sagt er að konur hafi á klæðum og klæði eru höfð í fleirtölu þágufalli. Þökk sé þessari frétt á vef Morgunblaðsins að nú skil ég þetta orðtak fullkomlega. Í fréttinni segir: "SÁLFRÆÐINGAR við Kaliforníuháskóla halda því fram að konur klæði sig í djarfari föt eða "flottari" á mælikvarða tískunnar á þeim tíma tíðahrings þegar egglos er." Þarna er skýringin komin. Er þetta ekki einmitt að hafa á klæðum?
kv.
Konni

Það er svo margt kynlegt

2006-10-15T21:39:00.000Z

Mér finnst svo margt kynlegt þessa dagana. Það er eins og það kynlega sé á einhverskonar uppleið í samfélaginu og við sem erum sérstakir áhugamenn um hið kynlega kippumst við yfir undarlegheitunum þó við séum nú öllu vanir.
Kynlegheit nr. 1
Í gær fór ég á magnaðan flutning á Eddunni hans Jóns Leifs og hafði af því mikla unun. Mér finnst ekki viðeigandi að kalla það beint gaman því það hugtak nær ekki yfir þessa upplifun. Það kynlega var að ekki var uppselt á tónleikana. Eiginlega finnst mér að tvennir þrennir tónleikar á verkinu hefðu ekki verið óeðlilegir miðað við hversu mikill viðburður þetta var. Jæja, sem sagt ekki uppselt. Kynlegt!
Kynlegheit nr. 2
Í dag fór ég svo á þá merkilegu sýningu Pakkhús postulana í Listasafni Reykjavíkur og svo á Kjarvalsstaði á aðra merkilega sýningu á verkum Þórdísar Aðalsteinsdóttur auk smá innlits á gömlu meistarana. Það kynlega var að það var sko svo sannarlega ekki uppselt á þessi söfn í dag. Þó rigndi og rigndi og alveg upplagt að skella sér á listsýningar. Nei, segja má að ég hafi geta talið samtals gesti á báðum söfnunum á tám og fingrum. Þetta fannst mér líka kynlegt!
Kynlegheit nr. 3
Hvar vour allir? Jú, þeir voru að skoða nýja vöruhúsið hjá IKEA og á afmæli Smáralindarinnar. Er það ekki absúrd?
Spurning dagsins:
Er andleg krísa í landinu?
Kv.
Konni

Konur og freyðiböð

2006-10-15T13:04:00.000Z

Hámarksunaður margra kvenna er að fara í gott freyðibað, unaðurinn er því meiri því þykkari sem froðan er. Þetta finnst mér afar merkilegt fyrirbæri. Hvers vegna þykir konum gott að fara í freyðibað? Af hverju kunna karlar ekki á freyðiböð?
Ég þekki engan karl sem fer í freyðibað og finnst það gott. Eina froðan sem ég sé karla njóta er froðan sem myndast ofan á bjór. Því mætti segja að eini líkamshlutinn sem körlum finnst gott að baða í froðu séu varirnar.
Konur vilja hins vegar liggja í froðu. Ég fór í freyðibað um daginn bara til að prófa auðvitað. Hvað haldið þið að hafi gerst? Froðan varð að engu. Þegar ég lá þarna í baðkarinu froðulaus datt mér í hug hvort froðan væri bara ekki til að hylja nekt og veita öryggi því maður er ansi allsber í baðkari án froðu.
Konni

Golf er sannarlega tilvalin íþrótt fyrir hjón

2006-10-15T10:23:00.000Z

Kæru lesendur.
Golf er mjög skemmtileg íþrótt fyrir hjón eða sambúðaraðila af öllu tagi. Nú þegar haustar og golfáhugamenn þurfa að leggja kylfunum er ekki úr vegi að líta á ýmis tækifæri sem golfáhugamenn gætu nýtt sér til að viðhalda áhuganum yfir veturinn því ekki eru allir golfspilarar svo stöndugir að þeir geti leikið sínar átján holur í fjarlægum löndum.
Það sem ég á einkum við er að hugtök og hugtakanotkun íþróttarinnar á vel við bak við luktar dyr hjónaherbergisins. Þannig geta hjón sem leika saman golf notað hugtök íþróttarinnar sér til gleði og ánægju uns sól hækkar á lofti á ný. Ekki þarf mikið ímyndunarafl til að sjá tækifærin. Tökum til dæmis hugtökin kylfa, hola, teigur og pútter. Öll þessi hugtök geta golfhjón notað sér til skemmtunar í skammdeginu undir hlýju hjónasængur. Já, fjölskrúðugt táknmál ástarinnar getur auðgað hjónabönd og viðhaldið ástinni. Sem betur fer iðka hjón afar sjaldan saman knattspyrnu því hugtök knattspyrnunnar eiga afar illa við í ástarlífinu. Hugtök eins og vítateigur, útspark, varamaður og innkast.
Af þessu má sjá hversu heppileg golfíþróttin er fyrir hjón.
Kveðja,
Konni

Ástríður á Alþingi

2006-10-13T22:19:00.000Z

Ýmsir vilja á þing ef miða má við alla þá sem taka þátt í prófkjörunum. Frambjóðendur keppast við að kynna sig. Þeir tíunda baráttumál og kynna sína persónu í viðamiklum auglýsingum. En er ekki kominn tími til að við kynnumst stjórnmálamönnum okkar frá nýrri hlið. Viljum við ekki öll einmitt kynnast ástríðum stjórnmálmanna? Er ekki afleitt ef á þing velst ástríðulaust fólk? Viljum við þannig fólk á þing? Hér með skorar Konni á þjóðina að sameinast um að kjósa á þing fólk með ástríður. Ef þingmenn nytu ásta af meiri krafti er ég viss um að lagasetningar og svo staða þjóðarbúsins gengi betur fyrir sig. Þá yrði til dæmis aldrei þæft fram undir morgun um ýmis leiðindamál því þingmenn væru löngu komnir heim til að njóta ásta. Þetta gæfi þjóðinni allri gott fordæmi rétt eins og Davíð Oddson sýndi er hann gekk um bæinn með bundið fyrir augu í einn dag í þágu blindra. Hefði ekki líka verið snjallt af honum að vera heima eða í faðmi konunnar í sumarbústaðnum eins og einn dag. Fjölmiðlar myndu safnast saman við heimilið eða sumarbústaðinn og að kvöldi kæmi ráðherrann og eiginkonan út í silkisloppum og ráðherrann lofaði meyna sem dæsti af ánægju. Þannig stjórnmálamann vil ég fá á þing. Kjósum ástríður á þing.

Konni kynlegi kynnir sig

2006-10-13T22:07:00.000Z

Þá er loksins komið að því að ég, vegna fjölda áskorana, hef ákveðið að verða við beiðni ýmissa kvenna á besta aldrei að veita þeim þá ánægju að uppfræða þær um kynleg fræði. Einkum verður höfðað til kvenna á Fljótsdalshéraði því þær hafa sýnt málinu sérstakan áhuga. Vonandi sýna aðrar konur viðlíka þroska og fróðleiksfýsn og þær. Gleðikvennafélag Vallahrepps verður stuðningsaðili minn við þessi skrif og þigg ég frá þeim góð ráð. Kynleg fræði eru skilgreind sem þau vísindi sem höfða til kynlegheita. Þetta eru ekki bein kynfræði, samanber hugtakið kynfræðsla heldur miklu dýpra og hnitmiðaðra hugtak sem engum hefur tekist að komast til botns í ennþá. Öllum er velkomið að beina spurningum til mín og mun ég reyna eftir bestu getu að fullnægja fyrirspyrjendum. Mér til halds og traust er siðgæðisvörður sem gengur undir því vafasama og villandi dulnefni miss Drunkenboldt. Hún hefur heitið því að standa vörð um siðgæði síðunnar því ég á það til að fara yfir strikið. Þeir sem óska eftir að verða skráðir á aðdáendalistann þurfa að senda mér línu eða kommennt. Kær kveðja til ykkar allra Konni kynlegi.